Bazohlazeka kolweMoja Love
KUZOBASHUBELA obaba abangondli kuleli njengoba kusukela ngoLwesine ebusuku isiteshi esisha iMoja Love, DStv (channel 157), sizokhombisa uhlelo iNo Excuses, Paypapgeld, oluzokwethulwa uMoss Mokwati.
Kulolu hlelo oluzongena ngo-6.30 ntambama kuzobonakala abazali abangafuni ukondla izingane bevakashelwa emakhaya nalapho besebenza khona imbala.
UMoss ozokwethula uhlelo, ekhuluma neSolezwe uthe alukaze lumshaye nakancane uvalo ecelwa ukuthi abe ngumethuli walo kodwa wasukumela phezulu.
“Lucishe lufane nolwaphesheya kwezilwandle olubizwa ngeCheaters. Lapha silandela ubaba noma umama ongabanakile abantwana noma umntwana wakhe. Ngalolu hlelo sithemba ukuthi sizosiza abantu abaningi,” kuchaza uMoss.
Uthe yize bekhona abesifazane abazobonakala ohlelweni kodwa iningi kuzoba abesilisa.
“Sihlala phansi nomuntu osibizile asixoxele ngobudlelwane anabo nengane naye ukuze sizwe ukuthi indaba yabo iqalaphi futhi yini afuna simsize ngayo. Kwezinye izindawo ngeke ngiqambe amanga sihlangabezane nobunzima abantu befuna ukulwa nathi ngoba bebona amakhamera besitshela ukuthi sizobukisa ngabo kodwa besibatshela ngomoya ophansi ukuthi size ngani futhi bagcine besilalele,” kuchaza yena.
Uthe abantu bazoluthokozela uhlelo futhi yize besagxile eGoli babheke ukuthola abanye abantu bakwezinye izindawo.
“Okwamanje besisagxile eGoli kuphela singakaphumeli kwamanye amadolobha. Iphupho lami wukuthi kusizakale abantu abaningi ngalolu hlelo njengoba izingane zisuke zingazi lutho kodwa zizithole sezikhula ngaphansi kwesimo esinzima,” kuchaza yena. IMoja Love isiteshi sethelevishini esiqale ngesonto eliphelile ngoLwesithathu nesizogxila ezinhlelweni zothando kakhulu.