Sivalwe yintsha ye-ANC nabazali isikole esinafundi abangu-120 ekilasini
SIVALIWE isikole okuthiwa sinabafundi abangu-120 ekilasini ngalinye, KwaDukuza.
ITinley Manor Primary, eselokishini eVelani, eTete, KwaDukuza ivalwe wuphiko lwentsha lwe-ANC lwendawo nabazali ngeledlule. Abazali bathi bafuna uMnyango wezeMfundo esifundazweni uzobachazela ukuthi kuzoqalwa nini ukwakhiwa kwalesi sikole. Bathi sekunesikhathi bethenjiswa kodwa kungenzeki.
Lesi sikole sinabafundi abangaphezulu kuka-1 400, amakilasi akhiwe ayisikhombisa bese kuba angomahamba nendlwane ayisishiyagalolunye kodwa manje sekusele ayisikhombisa ngoba amabili asha. Abazali bathi bathenjiswa ukuthi amakilasi ashile azolungiswa ukuze abanye abafundi bafundele kuwo kodwa akwenzeki.
UMnuz Sihle Mlotshwa okhulumela uMnyango wezeMfundo kulesi sifundazwe uthe bayalwazi lolu daba.
“Uthe seluqaliwe uhlelo lokudwetshwa kwepulani yesikole kodwa ukwakhiwa kwaso kuzoqala ngoSepthemba. Siyacela umphakathi ubambisane nomnyango ukuze uhlelo lokufunda nokufundisa lungaqhubeki nokuphazamiseka.
Usihlalo wesigungu sabazali esikoleni, uMnuz Mncedisi Makhathini, uthe othisha bakulesi sikole kuyenzeka bafundisele ekilasini elilodwa babe babili.
“Ngesikhathi omunye uthisha efundisa esinye isifundo omunye ufundisa esinye. Labo bafundi abafundi kahle bayaphazamiseka. Ekugcineni bayafeyila. Kungcono sivalwe isikole kuze kulungiswe udaba,” kusho uMakhathini.
Uthe incwadi yezikhalo ithunyelwe emnyangweni, isikole sizovalwa kuze kube uLwesithathu. Ngalolu suku kulindeleke uthi umnyango uzocacisa ngalolu daba.
“Uma incazelo yomnyango isigculisa sizovulwa isikole kodwa uma ingagculisi ngeke sivulwe. Kusiza ngani ukuthi kuvulwe isikole kube kwaziwa kahle ukuthi izingane zizofeyila ngoba ziyaphazamiseka,” kusho uMakhathini.
UMnuz Mandla Khumbuza we-ANC Youth Legue uthe bese bephelelwe ngamasu abangawasebenzisa ukuze umnyango ubanake. Sathenjiswa kusukela ngo-2004 ukuthi isikole sizolungiswa. Kuze kube manje asilungiswa,” kusho yena.
Ikhansela, uMnuz Bonginkosi Dindi, lithe banethemba lokuthi umnyango uzoqhamuka nesisombululo.
“Akukuhle ukuthi izingane okumele ngabe zisesikoleni zihlale emakhaya,” kusho uDindi.
Khona manjalo kuyo le ndawo kuthiwa kubonakale izingwenya ezintathu emhosheni onamanzi.
UDindi uthe lezi zingwenya ziqale ukubonakala ngoLwesihlanu.
“Okwamanje awukabi khona umonakalo osabikiwe kodwa ikhona ingozi. Izingane zibuye zibhukude kulawa manzi njengoba kushisa nje. Okwamanje angikazi ukuthi zifike kanjani lapha kodwa ngiyasola ukuthi ziphunyuke epulazini elizifuyayo, iLucingo, eseGlendale.
UMnuz Musa Mntambo okhulumela ezeMvelo KZN Wildlife, unxuse umphakathi ukuthi ungasondeli kuzona. Uthe bazophawula ngokuphelele uma sebethole umbiko ophelele.