Bafuna osolwa ngokudlwengula nokubulala
UMPHAKATHI waKwaLindizwe, eNgwavuma, awusalali uthungatha umfana osolwa ngokuthumba intombazane eneminyaka eyisishiyagalolunye, wayidlwengula maqede wayibulala ehlathini.
Umsolwa kuthiwa ubaleke wangena eSwazini njengoba ihlathi obekulahlwe kulo isidumbu sentombazane linendlela engena khona.
Isidumbu sikaMandisa Mngomezulu obefunda uGrade 5 eMbalekelwa Primary sitholwe ehlathini ngoLwesine ebusuku kunezinkomba zokuthi uklinyiwe, iphenti lakhe libekwe eduze kwakhe ephulwe nengalo.
Okhulumela amaphoyisa KwaZulu-Natal, uCaptain Nqobile Mbonambi uthe amaphoyisa aseNgwavuma athungatha umsolwa ngecala lokubulala nelokudlwengula.
Ugogo kaMandisa, uNkk Thembisile Myeni, uthe : “Umphakathi uhlupheke kakhulu ubheka umsolwa, awulali. Kumanje kukhona abantu abaye eSwazini beyombheka khona. Amaphoyisa asenzele phansi, ngelanga lesigameko sawabiza ingane isadukile aze afika sekutholwe isidumbu sayo.”
Elandisa Isolezwe uthe wahlukana nomzukulu eya enkonzweni ngoLwesine ntambama wamshiya nonina nezingane zakamakhelwane bedlala.
“Waze wakhala sengiphuma wathi ‘gogo ungishiyelani namhlanje njengoba sihlale sihamba nawe esontweni’. Ngafonelwa ngisesontweni kuthiwa abamboni. Wagcinwa edlala egcekeni nezinye izingane wabizwa umfana wendawo. Wabhekwa umsolwa wabonakala ngasemahlathini wajahwa kodwa wabaleka wayongena kule ndlela yaseSwazini njengoba sihlukaniswe yihlathi kuphela. Kwatholakala uphaqa wengane ulengela eweni kwalandelwa, sathola isidumbu sakhe eseshonile ehlathini elinewa,” kusho uNkk Myeni ekhala.
Utshele Isolezwe ukuthi okubaphethe kabi wukuthi amaphoyisa bawagcina ezolanda isidumbu abazi kwenzekani ngecala. Abantu kuthiwa badiniwe ngalesi sehlakalo kanti bafuna ukuthi umsolwa atholwe.
Ikhansela, uMnuz Mandla Ndlela, nalo lihambe emazwini kaNkk Myeni lathi baziphenyela bona ukuthi umsolwa ukephi.
“Umphakathi awulali uthungatha umsolwa. Okwenza kube nzima wukuthi amaphoyisa awasitsheli ukuthi kuhamba kanjani ngophenyo, lokho kwenza kube nzima ukuthi umphakathi usebenzisane nawo. Umphakathi uhlalele ovalweni ngoba awazi noma umsolwa uzobuya ahlasele ezinye izingane njengoba kuthiwa ubenawo umkhuba wokubiza izingane ezincane uma zisemakubo,” kusho uNdlela.
Umsolwa kuthiwa ubehlala nomfowabo oyiwele naye kodwa owayengekho ngelanga lesigameko. Kuvele ukuthi umsolwa ubengumahlalela ogxile ezidakamizweni.
UMandisa uchazwe njengentombazane ebilithanda isonto njengoba ngoDisemba ibisemsakazweni iMaputaland iyohlabelela nosonto sikole. Kuthiwa ubeyithanda imfundo ngoba ubengalovi esikoleni noma ngabe kuthiwa kwenzekeni.