Kugule omunye kulungiselelwa umngcwabo wowadla imbuzi
ALIBANGE lisamngcwaba umfowabo oshone emuva kokudla inyama yembuzi, ilunga lomndeni wakwaZondi eSigodini, eMgungundlovu, eligule isigubhukane laphuthunyiswa esibhedlela izolo lijuqwa yisisu okusolwa ukuthi nalo ladla le nyama.
UMnuz Moses Zondi (53) uphuthunyiswe esibhedlela sase-Edendale ejuqwa yisisu. Ungomunye wabadla inyama yembuzi ngeledlule.
Izolo, bekufihlwa uMnuz Mandla Phineus Zondi oshone ngemuva kokujuqwa yisisu, abanye kuvele ukuthi bayangena bayaphuma esibhedlela kodwa isisu sibuye sibajuqe baphindele khona.
“Angikwazanga ukufihla umfowethu ngoba isisu sivele sangiphatha kanzima ekuseni. Ngiphuthunyiswe esibhedlela njengoba sengikwazi nokukhuluma nawe. Ngiphatheke kabi ngoba ngisahlezi esibhedlela kusho ukuthi umgcwabo womfowethu ngeke ngisawufica. Inyama ngayidla kodwa ngangagula ngaleso sikhathi,” kusho uZondi.
UMnuz George Mkhize okuyisekhweni lakhe kaZondi uthe bathwale kanzima ngomngcwaba abantu bengafuni ukuyilokotha inyama yenkomo ebihlatshiwe.
“Kuhlatshwe inkomo yokuphelezela ohambile, imbuzi ayizange ibekhona. Kuthe sekuphunywa emathuneni kwahlakazekwa abanye omakhelwane besaba ukudla inyama yenkomo ebihlatshiwe,” kusho uMkhize. Amanazaretha kuthiwe anikeziwe inyama aziphekela egcekeni. Isolezwe ngoMgqibelo libike ngalolu daba, laveza ukuthi uNkk Jabu Mkhize, ubesesongelwa wumphakathi omsola ngokuthakatha, uthi ubeqonde ukubulala abantu njengoba yena engazange agule. Bakhona abanye abasesibhedlela yize abanye sebephumile. Ngokusho kukaMkhize, kukhona abathe bavela eMnyangweni wezeMpilo abathatha ujeqe nenye inyama bayokuhlola ngeledlule.
“Siyathemba ukuth uma inyama isihloliwe sizokwazi ukuthi bekukhona yini inkinga ngayo,” kusho uMkhize.
Inyama yembuzi kuthiwa kwakungeyomsebenzi. Yadliwa emuva kwesikhathi kwaba khona abagulayo. Kwaqale kwaphuthumiswa abawu-7 esibhedlela e-Edendale, kwabuye kwalandeliswa ngabangaphezu kuka-10. Bacela ku-20 abantu okuthiwa bangeniswe esibhedlela.
UDkt Bongani Nxumalo, onengosi yezempilo kwiSolezwe NgoMgqibelo uthe uma abantu begule ngale ndlela, kungenzeka ukuthi inyama yangenwa wukungcola okuthile base beguliswa yi-Food Poisoning. Alikho icala alivuliwe ngokushona kukaZondi.