Uhlaba abaholi abeba imali ye-IFP
UMHOLI we-IFP, inkosi Mangosuthu Buthelezi, ukhwele wadilika kubaholi benhlangano yakhe abasola ngokukhwabanisa imali ecishe ibe ngaphezu kuka-R3 million yobulungu.
Ekhuluma enkundleni yezemidlalo kwa-C KwaMashu izolo, emcimbini wokwethula umkhankaso weqembu njengoba kubhekwe okhethweni lukazwelonke ngonyaka ozayo, uButhelezi uchaze abaholi abebe le mali njengamasela wathi kumele bayibuyise.
“Kungizwisa ubuhlungu ukuthi kunabaholi asebethathe amabhuku obulungu ekomkhulu lamahhovisi ethu abangakaze bayibuyise imali yawo, ngale ndlela sebekhwabanise le mali efanele ukuba ngeye-IFP, eminyakeni edlule sebekhwabanise imali engaphezu kuka-R3 million, cabangake ukuthi ngabe senzani ngalesi samba semali,” kusho uButhelezi.
Uthe impilo ye-IFP incike emalini yobulungu ekhokhwa ngamalungu abo.
“Ngiyanikhuthaza ukuba nikhokhe, nxa ningakwazi nenze abaholi bakwazi ukuziphendulela, babe novalo lokuthumela imali yobulungu benu kwi-IFP, yikho khona lokhu okuncane okungahlangana kwenze umfudlana,” kusho uButhelezi.
Uthe uvamile ukukhuluma nabantu ngokuvuselela ubulungu babo, wengeza ngokuthi bahlale bemtshela ukuthi kunzima kangakanani ukukhokha uR10 wobulungu. “Le mali ikhokhela izindleko zeqembu iphinde isize noma sekwenziwa imikhankaso yokhetho,” kusho uButhelezi. Uphinde wanxusa amalungu enhlangano yakhe ukuthi enze isiqiniseko sokuthi ayiqenda nya indaba yezinhlangothi enhlanganweni. “Ngiyanicela ukuba niyiyeke le nto yezinhlangothi ngoba izolibulala nya iqembu lethu, ngiyezwa ukuthi sekukhona o-KKK no-AU lapha ngaphakathi enhlanganweni,” kusho uButhelezi. U-KKK kuthiwa umele ukuthi Kuhle Kuhambe Kahle, u-AU umele ukuthi Abusekho Ubunzima. UButhelezi uthe banqabile ukuthi baye ezingqungqutheleni zabo ngoba bengafuni ukuthi kuphume imiphumela ephekiwe njengoba kukhona amaziko ayizipoki.
Uthe bathathe isinqumo sokuthi bazihlehlise izingqungquthela ngoba behlonipha amalungu abo.
UButhelezi uphinde waphawula ngokwesula kobenguMengameli uMnuz Jacob Zuma wathi ukwesula kwakhe kuzovula ithuba loshintsho lapha eNingizimu Afrika.
Uthe kodwa akuyena uZuma kuphela oyinkinga, wengeza ngokuthi inkinga idalwa yimigomo ye-ANC okumele kuliwe nayo.
Unxuse abavoti ukuba bayijezise i-ANC ngokungayivoteli okhethweni lwangonyaka ozayo.