Izikhulu zikamasipala ecaleni lenkohlakalo kaR13 million
KULINDELEKE ukuthi kuboshwe nezikhulu zoMkhandlu waseMajuba, eNewcastle, ngamacala enkohlakalo nokukhwabanisa athinta uR13 million.
Lezi zikhulu zisolwa ngokukhipha amathenda ngaphandle kokulandela imigudu efanele, eziwanikeze osomabhizinisi abayisithupha asebeboshiwe ngalawa macala.
Labo somabhizinisi bavele enkantolo yamacala athinta ezezimali eThekwini ngoLwesine nangoLwesihlanu. Icala labo lahlehliselwa uMashi 14, ukuze kuqhutshekwe nophenyo.
OMnuz Raymond Mazibuko (46), Clifford Mkhize (35), uNkk Nombikhona Madisha (43) noMnuz Fondy Madisha (52) bavele enkantolo ngoLwesine.
UMnuz Mehmood Amodjee (30) noFazeela Bee Bee Amodjee (65) bona bavele ngoLwesihlanu.
Bonke laba basolwa bangosomabhizinisi abenzela uMkhandlu waseMajuba umsebenzi. Badedelwe ngebheyili ephakathi kuka-R1000 no-R3000 emunye.
Kuyasoleka ukuthi bebehlangene nezikhulu zikamasipala benikwa imisebenzi ngaphandle kokulandela imigudu efanele.
Kuthiwa umasipala ukhiphe amathenda angaphezu kaka-R13 million, anikwe laba basolwa.
Okhulumela oKlebe KwaZuluNatal uCaptain Simphiwe Mhlongo, uthe bonke abasolwa abayisithupha bangosomabhizinisi, bazinze eNewcastle basebenzisana noMkhandlu waseMajuba.
UMhlongo uthe uphenyo luveza ukuthi abasolwa bebehlangene nezikhulu zomkhandlu kunikwana imisebenzi, bese osomabhizinisi babuye esithe sebezonika amantshontsho izikhulu zikamasipala bezibonga.
“Uphenyo lwethu selusesigabeni esibucayi. Sizozibopha khona maduze izikhulu zomkhandlu ezithintekayo kulawa macala,” kusho uMhlongo.
Uthe banobufakazi obuqinile abazothi uma bebuthula enkantolo, abasolwa libagojele icala.
“Lawa macala enzeke ngesabelomali sika-2011/2012. Besilokhu siqhubeka nophenyo njengoba size sababopha manje abasolwa,” kusho uMhlongo.
Kwenzeka lokhu nje, oKlebe basanda kubopha osomabhizinisi abadumile eThekwini kubalwa nomholi we-ANC eKZN uMnuz Mike Mabuyakhulu mayelana namacala enkohlakalo nokukhwabanisa athinte uR28 million, owakhishelwa umcimbi iNorth Sea Jazz Festival okwakumele ibengo 2013, kodwa eyagcina ingenziwanga.
Asomabhizinisi abathinyeka kuleli cala badedelwe ngebheyili kaR30 000, umuntu emunye. UMabuyakhulu yena nowayeyiNhloko yoMnyango uMnuz Des Golding bona badedelwa ngebheyili kaR50 000 emunye.
Okhulumela uMnyango wezokuBusa ngokuBambisana neziNdaba zoMdabu KwaZuluNatal uMnuz Lennox Mabaso uthe bayathemba ukuthi ukuboshwa kwabasolwa kuzothumela umyalezo ohlale ugcizelelwa nguNgqongqoshe wabo uNkk Nomusa Dube-Ncube othi inkohlakalo ngeke yamukelwe.