‘Asithintwe uma kunezinqumo ezinqala’
AMALUNGU e-ANC eThekwini athi afuna ukuthintwa uma kuzothathwa izinqumo ezinqala enhlanganweni emuva kokuhoxiswa kobenguMengameli wezwe, uMnuz Jacob Zuma, esikhundleni sakhe.
UNobhala we-ANC eThekwini, uMnuz Bheki Ntuli, uveze lokhu izolo emhlanganweni woSihlalo noNobhala bamagatsha e-ANC esifundeni namalungu e-National Executive Committee (NEC), obuseMoses Mabhida Stadium.
UNtuli uthe amalungu amagatsha athe kungangcono ukuthi athintwe ngaphambi kokuthi kuthathwe izinqumo ezinqala.
“Asikwazi ukuthi amalungu amagatsha ethu adiniwe noma ajabule ngesinqumo esithathiwe kodwa aphakamise ukuthi kungangcono aziswe ngezinqumo ezizothathwa ngaphambi kokuthi zimenyezelwe kwabezindaba. Okubalulekile wukuthi amaqabane ayasamukela isinqumo se-NEC futhi azoyivotela i-ANC abuseke nobuholi bukaMengameli Cyril Ramaphosa,” kusho uNtuli.
Uthe bebekade bememe amagatsha awu-110 kodwa kwafika awu-98 emhlanganweni wayizolo wokuxoxa nobuholi bukazwelonke.
UDkt Zweli Mkhize oyilungu le-NEC uthe amaqabane awadiniwe kodwa aveze umbono wawo kubona njengoba bejutshwe yi-ANC ukuthi bazokhuluma nabantu emagatsheni ngesinqumo sokuhoxisa obenguMengameli wezwe esikhundleni.
“Amalungu e-NEC ajutshwe kuzo zonke izifunda ze-ANC ukuchazela abantu ngezinqumo ezenziwe. Umuzwa esiwutholile ngowokuthi abantu bayasamukela isinqumo esithathiwe futhi bazimisele ukusebenzisana nobuholi bukaMengameli Ramaphosa nethimba lakhe. Bathe bayadinga ukuthi kuphele ukuxabana kwabaholi emithonjeni yabezindaba. Bathe bafuna kucace ukuthi ngubani okhulumela i-ANC kungakhulumi wonke umholi,” kusho uMkhize.
Uthe bazothatha iziphakamiso zamalungu e-ANC eThekwini nakwezinye izifunda baziyise ebuholini bukazwelonke lapho zizocutshungulwa khona.
Mayelana nokusabalala kwamahlebezi okuthi angase abe ngungqongqoshe wezeziMali uma sekunezinguquko kwiKhabhinethi, uMkhize uthe akazi avelaphi lawo mahlebezi ngoba akukho abakutsheliwe bona.
“Silindele uNgqongqoshe wezeziMali, uMnuz Malusi Gigaba, athule umbiko wesabelozimali ngoLwesithathu, akukho esikwaziyo ngamahlebezi okushintshwa kongqongqoshe kwiKhabhinethi. Esikufundayo njengamanje wukuqagela kwabathile esingazi ukuthi imininingwane bayithathaphi ngoba asiyazi,” kusho uMkhize.
Amalungu esifazane e-ANC eThekwini abekade ebhoka ngolaka ethi: “INEC itshelwe ezikabhoqo ngaphakathi, ayingenzi sengathi konke kuhamba kahle,”
Kuthe Isolezwe liya kubona ukuze lithole ukuthi bezithini ezikabhoqo ezitshelwe i-ANC akhuzwa ukuthi angakhulumi nabezindaba.
Bawu-26 abantu ababuze imibuzo ngodaba lokuhoxiswa kobenguMengameli, abanye baphakamisa ukweseka uMengameli okhona kanti abanye bebefuna kucace ukuthi uNobhala Jikelele ubambe liphi iqhaza ekubunjweni kwenhlangano.