UMengameli Ramaphosa ubhekene nesivivinyo sokuqala
UBUHOLI bukaMengameli Cyril Ramaphosa buzovivinywa kuleli sonto njengoba kulindeleke ukuthi enze izinguquko kwiKhabhinethi yakhe, okuzoholela ekutheni abanye ongqongqoshe balahlekelwe yimisebenzi yabo.
Namhlanje, uRamaphosa uzohlangano nezikhulu ze-ANC ekomkhulu layo eLuthuli House lapho kulindeleke ukuthi azibikele mayelana nezinhlelo zakhe zezinguquko.
URamaphosa nesigungu esiphezulu samalungu eqembu ayisithupha kulindeleke ukuba baxoxe namadlelandawonye ngezinguquko ngaphambi kokuthi zenziwe, okuyimizamo yokuqinisa ubudlelwano. I-Cosatu neSACP bebehlale bemgxeka obengumengameli uMnuz Jacob Zuma ngokungabazisi uma enza izinguquko ezinqala.
URamaphosa ungaphansi kwengcindezi yokuthi avale nesikhala sePhini likaMengameli wezwe. UNgqongqoshe wezokuMbiwayo, uMnuz Mosebenzi Zwane, owezamaBhizinisi kaHulumeni uNksz Lynne Brown nowezokuBusa ngokuBambisana neziNdaba zoMdabu, uMnuz Des van Rooyen kulindeleke ukuthi bagawulwe yizembe njengoba uRamaphosa ethembise ukuthi kuzoba khona izinguquko kwiKhabhinethi.
UZwane uyathitheka enkohlakalweni yasepulazini laseFree State, iVrede Dairy Farm, lapho umndeni wakwaGupta kuthiwa wathola ngendlela engekho emthethweni imali elinganiselwa kuR220 millon, eyakhishwa wuMnyango wezoLimo eFree State kusaphethe uZwane kulo mnyango.
Lokhu kuthiwa kwenzeke ngaphambi kokuthi uZwane aqokwe ukuthi abenguNgqongqoshe wezokuMbiwayo lapho kuthiwa ubesiza umndeni wakwaGupta ukuthi uzitamuzele imali kwa-Eskom.
UMnuz Pravin Gordhan kubhekwe ukuthi aqokwe eMnyangweni wamaBhizinisi kaHulumeni.
Ilungu le-ANC lithe:“Ezinye zalezi zinguquko vele kufanele zenziwe kodwa kusazoxoxwa ukuze kuvunyelwane ngazo ukuze kungabi nezikhalo ngokungaxhumani ngaphambi kokuthathwa kwezinqumo njengoba kusanda kwenzeka.”NgoLwesihlanu, uRamaphosa uthe uzothatha izinqumo ezinzima ukuze alungise isimo emabhizinisini kahulumeni.
Umhlaziyi wezepolitiki uMnuz Ralph Mathekga uxwayise uRamaphosa ngokuthi uzoqhubezela uqhekeko uma ekhipha abantu abafana noMnuz Malusi Gigaba wezeziMali.