Ithimba elizolungisa kumasipala onezinkinga
Amakhansela akhulume naleli phephandaba athi sekuphele isonto akhetha uMalinga. Eseqokiwe kuthiwa imeya okumele isayine inkontileka yokusebenza kwemenenja yomkhandlu ayilubhadi emsebenzini ithi iyagula kodwa ibonakala edolobheni ihamba nabazukulu bayo.
UMnuz Musawakhe Mayisela, okhulumela uMnyango wokuBusa ngokuBambisana KwaZuluNatal, uthe ithimba elakhiwe yizinhlaka ezehlukene lisungulwe ngoLwesihlanu.
“USomlomo walo mkhandlu ngokombiko esiwutholile uzobiza umhlangano ophuthumayo wamakhansela okuzodingidwa kuwo lolu daba. Sinethemba lokuthi luzoxazululwa maduze. Siwumnyango sizokwenza isiqiniseko sokuthi ukusebenza kumasipala akuphazamiseki,” kusho uMayisela.
UNkk Nciki usolwa nangokuthi wabhalela uNgqongqoshe woMnyango wezokuBusa ngokuBambisana uNkk Nomusa Dube-Ncube, ecela ukuthi kwelulwe inkontileka kaMbhele, ekubeni umkhandlu wamakhansela ungazange usithathe leso sinqumo.
Kuthiwa uNkk Nciki waxolisa ngaleli phutha.
“Sibona sengathi ubesishaya ngemfe iphindiwe ngokuxolisa ngoba kusukela kwathathwa lesi sinqumo akezi emsebenzini. Satshelwa ukuthi uyagula kodwa siyambona edolobheni, etetemuka nabazukulu bakhe. Uma kuliqiniso ukuthi uyagula kungani iphini lakhe lingayisayini leyo nkontileka. Kunezinhlelo zokusebenza eziphazamisekayo okumele ngabe zisayinelwa yimenenja. Siyazi ukuthi ubethanda ukuthi kubuyele uMbhele kodwa bekumele avumelene nesinqumo esithathiwe ngoba akasiphikisanga ngesikhathi sithathwa,” kusho elinye lamakhansela.
Ithintwa imeya ngalolu daba ibhoke ngolaka yathi iselivini kuze kube namhlanje ayibalekile.
“Bayangihlanyela, angizukwenza into ephambene nomthetho mina. Balokhu begijimela emaphepheni. Abakutshele ukuthi yisiphi isinqumo abasithatha,” esho evala ucingo.