Kubi i-IFP ifuna ukuxosha imenenja
USUTHATHE elinye igxathu umkhankaso we-IFP wokuxosha imenenja yoMkhandlu waseZululand, uMnuz Sipho Nkosi emuva kokukhishwa esikhundleni kukaSihlalo wekomiti eliqaphe ukusebenza kwezimali zikamasipala, ngoLwesihlanu.
NgoLwesihlanu, i-IFP ivotele ukuthi akhishwe esikhundleni uMnuz Mfanafuthi Mhlungu weDA ngoba imsola ngokuthi akawazi umsebenzi.
I-IFP ikhiphe uMhlungu yafaka uNkk Hlengiwe Mncwango ongunkosikazi weMeya yaKwaNongoma uMnuz Mangaqa Mncwango.
Ethintwa izolo uMhlungu uthe ayikho le nto eshiwo yi-IFP ukuthi ukhishwe ngoba ehlulwa wumsebenzi.
“Kunempi ekhona phakathi kweMeya uMfundisi Thulasizwe Buthelezi nemenenja uNkosi.
I-IFP ifuna ukukhipha uNkosi emkhandlwini ngezizathu zayo,” kusho uMhlungu.
Uthe isizathu esenza akhishwe wukuthi bona abahambisani nokukhishwa kukaNkosi ngoba abazi ukuthi kuthiwa wenzeni.
“Njengoba bekhipha mina kuleli komiti befaka uNkk Mncwango kuthiwa bahlela ukupheka umbiko ongekho ukuze bakwazi ukumbeka amacala uNkosi khona bezomxosha,” kusho uMhlungu.
Ngokuthola kweSolezwe uNkosi usehamba ethuka izanya, useze waqinisa ezokuphepha njengoba umkhankaso wokomketula ushuba.
Ngokuthola kweSolezwe umkhandlu usuthathe isinqumo sokuthi ungeze isibalo sonogada bakaNkosi ngoba ubona ukuthi nempilo yakhe isengcupheni.
Ikhansela le-ANC kulo mkhandlu uMnuz Mkhawuleni Khumalo likuqinisekisile ukuthi sikhona isinqumo somkhandlu lapho wavumelana khona IKHASI ELIKHOKHELWE ngokuthi kumele ziqiniswe ezokuphepha kuNkosi ngoba sengathi akasaphephile.
“Ngemuva kokuhluleka kwamahlandla amaningi okuyikhipha esikhundleni imenenja, kubonakale kuphusile ukuthi iqiniselwe ezokuphepha ngoba uma kunesimo esinjalo nomuntu usuke engasaphephile,” kusho uKhumalo.
Uthe ibaphethe kabi le nto eyenzekayo ngoba igcina isiphazamisa ukusebenza komkhandlu.
“Kusukela ifikile imeya entsha uButhelezi ikhombisa ukuba nenkinga ngoNkosi. Isizame amahlandla ambalwa ukumkhipha ngevoti emhlanganweni wamakhansela kodwa yahluleka,” kusho uKhumalo.
Ethintwa uNkosi unqabile ukuphawula ngalolu daba, wathi akakhulumi nabezindaba.
UButhelezi uyakuphika ukuthi kukhona imizazo yokukhipha uNkosi eyenziwa yi-IFP. Ungeze ngokuthi uNkosi uqashwe wumkhandlu.
“Iqembu i-IFP linesibopho elasenza nabantu ukuthi lihole umkhandlu ongenayo inkohlakalo,” kusho uButhelezi.
Uthe ngeke akwazi ukuphawula ngezivumelwano zokusebenzisana phakathi kwe-IFP neDA.