Ibuyise ithemba inkulumo kamengameli
UMENGAMELI Cyril Ramaphosa ubuyise ithemba kuwo wonke umuntu eNingizimu Afrika ngenkulumo yakhe yokuqala ebhekiswe esizweni ngoLwesihlanu.
Kucacile enkulumweni yakhe ukuthi uyaziqonda izinselelo izwe elibhekene nazo.
Kube kuhle ukuzwa engambangcazi ezama ukugqiba amahlazo kube sengathi uma kukhalwa kuyihaba, izinto azizimbi, okuyiqhinga ebelisetshenziswa uMnuz Jacob Zuma.
Sesijahile ukubona izinyathelo ezizothathelwa abasebenzi bakahulumeni abenza inkohlakalo njengoba abanye beyenza udede. Sijahile ukubona kuseqhulwini ukwakhiwa kwamathuba emisebenzi adingwa kakhulu yintsha.
Kanjalo nokukhuculula inkohlakalo ezinkampanini zikahulumeni njengeEskom, Transnet, SABC, SAA, Prasa nezinye eseziphendulwe ibhodwe eliconsayo ngabaqashwe kuzo nabasuke beqokelwe emabhodini azimele alekelela ukulawula lezi zinkampani.
URamaphosa uthe kuzophela ukuthi amalungu amabhodi angene agamanxe ezindabeni zalezi zinkampani njengoba amanye awo aze anqume nokuthi imisebenzi yamathenda ikhishwe kanjani.
Kuhle nokuzwa uRamaphosa ethi iminyango kahulumeni ekhona izoncishiswa ngoba miningi kakhulu. Yiqiniso leli futhi lokhu yinto esezandleni zakhe yedwa ngoba angayenza masinyane nje kungakathulwa ngisho inkulumo yesabelo-mali ngokuxosha abanye ongqongqoshe ngokuthi avale eminye iminyango ngoba vele asikho isidingo sayo besekuthi eminye ihlanganiswe.
Uthembise nokusungula ikhomishini ezophenya ngemigilingwane eyenzeka kubaqoqi bentela, i-South African Revenue Services ukuze kuzobuya isithunzi salolu hlaka.
Izinhlelo zokuqeda ububha, ukukhulisa osomabhizinisi abamnyama, ukunciphisa ukungalingani sizozibheka ngabomvu ukuthi ziyenzeka ngempela yini.
Usekhulumile-ke uRamaphosa, kuzwakele futhi ithemba likhulu kuwo wonke umuntu. Sekufanele kubonakale ngezenzo manje. Asithembe-ke ukuthi bonke abantu abasezinhlakeni ezehlukene kuhulumeni bazwile futhi bazosaba ekhweleni likamengameli, kungahudulwa izinyawo njengoba amanye amalungu e-ANC enengekile ngesikhathi ekhuluma.