Mabuxolise esizweni ubuholi bukaKhongolose
Msawenkosi Makhedama KING CETSHWAYO DISTRICT MHLELI: Ngibona kumele ngiphumele obala ngicele iqembu elibusayo likaKhongolose ukuba lizehlise lixolise kubantu baseNingozimu Afrika.
Ziningi izinto ezenzekile kule minyaka ethi mayibe yishumi. Kuningi ukukhala okube khona abantu nezinhlangano zomphakathi bekhala ngendlela izinto ebezihamba ngayo.
Singabala lapha ukuxhashazwa kwemali okumele isize abahlwempu, ukubanjwa ngobhongwane koMbuso kusolwa umndeni othile nokunye okuningi. Kuzo zonke izinto ebezenzeka abuzange bubonakale ubuholi bukaKhongolose buphumela obala buhlabe lezi zenzo ezimbi.
Abaholi abanonembeza ebebezama abanjengoMakhosi Khoza bagcine sebezizwa sengathi bayabandlululeka uma bekhuza.
Umbuzo obuzwa ngabantu baseNingizimu Afrika uthi njengoba sibonile ubuholi obusha bukaKhongolose bulungiselela ukuyovotela ukungabethembi ubuholi bukaMengameli osephumile ubaba uZuma bebezothini uma sekumele benze isiphakamiso ePhalamende?
Ngabe bebezokusho lokhu obekuhlale kushiwo ngamaqembu aphikisayo?
Pho bebengakusekeli ngani yonke le minyaka uma kulungile? Ngabe bebebona ukuthi kulungile kodwa bebexhaphaza abantu ngoba bengenamandla?
Njengomholi wezenkolo ngibona kufanele ngicele ubuholi obukhona ukuthi buxolise kubantu buxolisele ubuholi obuphumile buphinde buvezele izwe ukuthi abethini amaphuzu ebebezoma ngawo ePhalamende uma sebephakamisa ukungamethembi uMnuz Zuma.
Abantu baseNingizimu Afrika abaphathwe ngenhlonipho bese uhlonishwa nomthethosisekelo wezwe. Mbhishobhi Themba Chonco MTUBATUBA