URamaphosa akaxoshe uBathabile Dlamini
MHLELI. Sekuyisikhathi sokuthi uMengameli omusha u-Cyril Ramaphosa akhalise isiswebhu kulaba abahlulwe wumsebenzi abanjengomama uBathabile Dlamini. Lokhu ngikushiso wukuthi kunenzukazikeyi yeSassa ne Cash Paymaster Services (CPS).
Kwakuhloboloni lwenkontileka lolu okuthiwa ingunaphakade? Kunzima kwiSassa futhi kudingeka ubuchule ukuze kuphunywe kule nkontileka yeSassa neCPS.
Ngake ngaloba phambilini ngodaba lweSassa neCPS lapho engathi khona kukhona okudla amantshontsho emsamo phakathi kweSassa neCPS okubukeka sengathi badla ngakhezolunye.
Sekukaningana izaguga zikhala ngobudedengu bale nkampani ebukeka idla imali yazo ngobudedengu.
Zakhala izaguga ngokuthathelwa imali yazo ngama airtime kukweletwe ugesi kuthiwa yizona. Kulokho kukhala umama Bathabile ubethalalisa ngokuthi akaboni nkinga nje.
Inkampani iCPS inobugebengu engibaziyo. Ngake ngehla ngenyuka ngilungisela umama ethathelwe u-R1000 kodwa ngaze ngayiwina impi . Kulokho ngasola yona iCPS ebukeka yenzela phansi izwe lethu nenhlangano ebusayo.
Ngicela ubaba uCR akhombe indlela umama uBathabile Dlamini. Khabzela Mzimela EZWELIBOMVU MHLELI: Kweliwela umfula udla izindwani ngicela ungiphe isikhala ngiphawule ngenkinga yesikole okuthiwa yiNgudwini Primary, esiseBulwer.
Umphakathi waba nemashi eyayiqondene nothisomkhulu. KwakuwuMsombuluko, ngoLwesibili sangavulwa isikole nangoLwesithathu saze savulwa ngoLwesine ukhiye uhambe nothishomkhulu. Nawo ukhiye waze watholakala ngoba sekungenelele amaphoyisa. Inkinga ekhona-ke maje wukuthi nabo okhiye abaphelele. Awukho ukhiye wokuvula umtapo wolwazi nowesango elikhulu lezimoto.
Besicela uMnyango kaNgqongqoshe uMthandeni Dlungwane ungenelele kulesi simo esibhekene naso. Gugulezwe Hadebe EBULWER