I-DUT imise ukufunda isikhathi esingaziwa
KUMISIWE ukufunda eDurban University of Technology (DUT) ngemuva kwezinsuku ezintathu kuqaliwe.
Ukufunda kule nyuvesi bekuqale ngoLwesibili, ngoLwesihlanu, inyuvesi imemezele ukuthi sekumisiwe, futhi akwaziwa ukuthi kuzoqhubeka nini.
Abasebenzi bale nyuvesi abangaphansi kwezinyunyana iNehawu, iTenusa neNteu basesitelekeni esingenela esontweni lesithupha namhlanje. Bafuna ukunyuselwa iholo. Baqale bafuna ukunyuselwa ngo-10% kodwa isiphakamiso sabo sokugcina sime ku-8.25% inyuvesi imi ku-6.25% etafuleni.
UMnuz Ayanda Zulu uNobhala weNehawu eThekwini uthe abazimisele ngokubuyela emsebenzini uma umqashi engavumelani nabo ngabakufunayo.
“Selokhu siqalile izingxoxo umqashi ugudluka kancane esiphakamisweni sakhe. Muva nje uthumelele umsebenzi ngamunye incwadi ethi akaphendule ukuthi ngabe uyasamukela yini isiphakamiso sakhe. Abasebenzi abakwazi ukwenza lokho ngoba bamelwe yizinyunyana. NgoLwesibili kulindeleke ukuthi sibuyele ezingxoxweni. Emhlanganweni kulindeleke ukuthi kube khona iPhini likaNgqongqoshe, uMnuz Buti Manamela,” kusho uZulu.
Uthe uma befinyelela esivumelwaneni bazimisele ukusebenza isikhathi esengeziwe ukuze babuyise isikhathi esilahleke, betelekile.
Izitshudeni zakulesi sikhungo zingenele esazo isiteleka ngoLwesithathu, zikhala ngokuhamba kancane kohlelo lokungeniswa ezindlini zokuhlala nangokubambezeleka kokuqala kwamanye amakilasi ngenxa yabasebenzi abafundisa izitshudeni abatelekile. Zikhala nangokuthi kuzogcina kuphazamiseke sonke isigaba sokuqala sokufunda uma abasebenzi nabaphathi bengafinyeleli esivumelwaneni ngokukushesha.
NgoLwesihlanu, le nyuvesi inqume ukumisa ukufunda.
UMnuz Alan Khan okhulumela le nyuvesi uthe inyuvesi izokhipha ikhalenda lokufunda elizolandelwa yile nyuvesi maduze nje.
Yize kunesiteleka sabasebenzi uthe abafundi asebebhalisile bangu-21 000. Le nyuvesi ithatha abafundi abangu-28 000 ngonyaka.
Uqhube wathi yize ukufunda kumisiwe kodwa ukubhalisa kusaqhubeka, online noma abafundi baziyele mathupha ezikhungweni zale nyuvesi.