ULiebenberg ukhale ngaphansi phesheya
UPHUME inqina kamabuyaze phesheya kwezilwandle umshayisibhakela waseNingizimu Afrika, uRyno Liebenberg, ohlulwe nguVincent Feigenbutz empini yebhande le-IBF Inter-Continental Super Middleweight ngoMgqibelo ebusuku eGermany.
ULiebenberg ufulathele leli nomqeqeshi wakhe uColin “Nomakanjani” Nathan, esonge ngokuthi uma ehluliwe uzosiyeka isibhakela. Nokho ukhale ngaphansi ngomzuliswano wesithupha emuva kokuthi unompempe enqume ukuthi ngeke esakwazi ukuqhubeka nempi ngenxa yenxeba ebelivuleke kuyena esiphongweni.
Ngokwamaphuzu uLiebenberg ubebukeka ehamba phambili. UNathan akachithanga sikhathi wezwakalisa ukushaqeka ngesinqumo sikanompempe. Iningi ebeliphawula belihambisana naye, limbonisa ngokuthi afake isimangalo ngoba ukubanjwa inkunzi kwamabhokisa sekujwayelekile eGermany.
ULiebenberg ubethwelwe ngeqoma kwazise usanda kwehlula uPatric Mukala waseDemocratic Republic of Congo osatshwayo. Ungomunye wabashayisibhakela abathandwayo esitebeleni iGolden Gloves Promotion kaRodney Berman. Nokho imizamo yokuthi aphathe isicoco somhlaba ayikaphumeleli.
Ngo-2016 uLiebenberg uhlulwe ngu-Eric Skoglund waseSweden empini yebhande le-International Boxing Organisation lnternational Light Heavyweight. Nyakenye ukhale ngaphansi ku-Enrico Koelling bebanga ibhande le-WBA Inter-Continental Light Heavyweight. Ukulangazelela kwabaphathi ukuthi uLiebenberg aphathe ibhande lomhlaba kugcine kuholele ekutheni ehliselwe esisindweni se-Super Middleweight.