Ukuphindile ewelisa i-Arrows kwiDiski
‘KUSOBALA ukuthi kungumsebenzi engawudalelwa ukuwelisa iLamontville Golden Arrows ngoba nangesikhathi siyidla okokuqala iMultichoice Diski Challenge kwaba yimina engashaya amagoli ayeqinisekisa lokho.’
Lawa ngamazwi kaNduduzo Sibiya weLomtville Golden Arrows oshaye amagoli amabili aqinisekise ukuthi leli qembu liqopha umlando wokudla okwesibili emlandweni isicoco seDiski.
USibiya ushaye amagoli amabili esiwombeni sesibili benqoba ngo 2-0 kwi-Orlando Pirates izolo eMakhulong Stadium, eTembisa. La magoli kube yiwona aqinisekise ukuthi i-Arrows ngeke isaficwa yize kusasele umdlalo owodwa ngaphambi kokuphela kwesizini. Lowo mdlalo i-Arrows izowudlala neBidvest Wits eBidvest Stadium.
“Ngijabulele kakhulu iqembu kunokuzijabulela mina. Yebo angisakwazi ukulinda ukuthi siye eSpain kodwa iqembu, abaqeqeshi, abaphathi nabadlali okuyibona esiyibamba nabo enkundleni ngibajabulele kakhulu. Kungenzeka ukuthi ngadalelwa ukuthi ngishaye amagoli ayisa iqembu phesheya kwezilwandle,” usho kanje uSibiya eqeda ukwamukela isipho sakhe ngokuqokwa njengomdlali ovelele osukwini.
Umqeqeshi kaSibiya uVusumuzi Vilakazi, uthe lokhu kuyinkokhelo kubaphathi beqembu nakubaqeqeshi besikimu esikhulu ngokubeseka njalo.
“Ngeke sijabule manje ngoba kusenomsebenzi okumele siwenze ngomdlalo wokugcina. Nakhona lapho asiyele ukuyoshaya izitayela kepha siyoqedela umsebenzi esiwuqalile. Kuhle ngoba asidingi ukukhuthazwa kangako ngomdlalo weWits ngoba iwini izosinika irekhodi elisha leDiski Challenge,” usho kanje uVilakazi.
Isipiliyoni sabadlali be-Arrows sicacile lapha ngoba bekuthi njalo uma kukhona abangakuthandi abePirates bagijime bayongunga unondweba kanti Abafana Bes’thende bebevele baqhubeke nomdlalo.
Imiphumela yeDiski Challenge: AmaZulu 0-1 Maritzburg United; Kaizer Chiefs 4-2 Platinum Stars; Free State Stars 2-5 Mamelodi Sundowns; Cape Town City 0-4 Bloemfontein Celtic; Baroka FC 1-0 Chippa United; Golden Arrows 2-0 Orlando Pirates; Bidvest Wits 5-1 Ajax Cape Town; SuperSport v Polokwane (uhlehlisiwe).