‘Sezisondele ezokuthi khumu kwiDusi’
UZIBEKELE umgomo wokubamba iqhaza kumaDusi amabili bese ethatha umhlalaphansi uThulani Mbanjwa owaqala ukugwedla ngo-1998 kulo mqhudelwano.
UMbanjwa ungene endaweni yesihlanu ehambisana noJacques Theron kwiFNB Canoe Dusi Marathon ephele eBlue Lagoon ngoMgqibelo.
UMbanjwa, owaqopha umlando ngokuba owokuqala omnyama ukudla umhlanganiso kwiDusi ehambisana noMartin Dreyer ngo-2008, utshele Isolezwe ukuthi sesisondele isikhathi sokuthi athi khumu.
“Ngizobuya ngamandla ngonyaka ozayo ngihamba ngedwa bese ngiyivala ngeK2 ngihamba nenye inkakha engingeke ngiyidalule manje. Ngiyobe sengivalelisa. Engikufunayo manje wukuvula isikhungo sami ngifundise abanye ngalo mdlalo ikakhulukazi abantu abamnyama,” kusho uMbanjwa.
UMbanjwa nophathina wakhe balandele uHank McGregor no-Andy Birkett abaphume phambili ngesikhathi esiwu-8:12:22:30, kwalandela uCarl Folscher no-Adrian Boros ngesikhathi esingu-8:13:26.70. Endaweni yesithathu kube uSibonelo Khwela noSiseko Ntondini ngesikhathi esingu-8:13:29.38, no-Ant Stott noBanetse Nkhoesa abangene endaweni yesine ngesikhathi esingu-8:13:40.48.
OMbanjwa benze u-8:35:56.81.
UMbanjwa uthe yize iDusi yalo nyaka ibinzima ngoba uTheron ubegula uJanuwari wonke bangakwazi ukuziqeqesha kodwa uyajabula ukuthi baphume isihlanu.
“Bengingabhekile ukuba senze kahle ngoba asikwazanga ukuzilungiselela kahle. Sangenela imiqhudelwano emibili kuphela ngaphambi kweDusi,” kusho uMbanjwa.
Uthe ukuqala ngo-10.30 ekuseni kubaqhathe nokushisa wathi namanzi abengemahle nokwenze bangakwazi ukuhamba ngokushesha ngenxa yesisindo somzimba. UMbanjwa uthe uyaziqhenya ngoKhwela noNtondini nabanye abantu abamnyama abenza kahle kwiDusi njengoba kwabangu-10 abaphume phambili, abantu abamnyama babebaningi. Abesilisa abangu-10 abahambe phambili: 1. Andy Birkett/Hank McGregor 8:12:22:30 2. Carl Folscher/Adrian Boros 8:13:26.70 3. Sbonelo Khwela/Siseko Ntondini 8:13:29.38
4. Ant Stott/Banetse Nkhoesa 8:13:40.48
5. Jacques Theron/Thulani Mbanjwa 8:35:56.81
6. Loveday Zondi/Thando Ngamalana 8:35:58.23
7. Mthobisi Cele/Mpilo Zondi (U23) 8:41:30.92
8. Nqobile Makhanya/Siyanda Gwamanda (U23) 8:41:32.15 9. Richard Cele/Nhlanhla Cele 8:43:51.59 10. Mmele Cele/Maswenkosi Mtolo 8:44:34.24
Abesifazane abangu-10 abahambe phambili:
1. Cana Peek/Jordan Peek (U23) 9:45:23.58
2. Christie Mackenzie/Bridgitte Hartley 9:53:45.45 3. Jenna Ward/Vanda Kiszli 9:53:48.09 4. Amy Peckett/Caitlin Mackenzie (U18) 10:33:06.49
5. Kyeta Purchase/Kerry Segal 10:36:22.77
6. Cara Waud/Tracey Oellermann (U18) 10:49:12.17 7. Kate Birkett/Nicky Ervine 12:10:46.48 8. Melissa van Rooyen/Lorna Oliver 12:25:22.36
9. Holly Spencer/Daniela Afonso 12:46:59.38
10. Casey Robertson/Anna Hauff (U18) 13:09:42.44