Ubhacile oshaywa yisoka elingaliwa
USEHLALA ekubhaceni owesifazane waseCliffdale ngaseHammarsdale osephenduke ukudla kwenduku, oshaywa yisoka lakhe elingafuni ukwaliwa.
Owesifazane oneminyaka engu-24, ongeke adalulwe ukuze kuvikelwe ingane yabo, uthe uzizwa engasaphephile ngoba usayisutha induku yize enencwadi yasenkantolo evimbela uyise wengane yakhe oneminyaka engu-26 ukuthi asondele kuye.
Izolo, ngesikhathi enengxoxo ekhethekile neSolezwe esekubhaceni , uthe usedinga usizo ukuze aphephe.
“Amaphoyisa ayehluleka wukungivikela, incwadi yenkantolo ayikwazi ukungivikela. Ngenze yonke imizamo yokuba angasondeli kimina kodwa ungena ngenkani ekhaya, angishaye phambi kwamalungu omndeni wami. Angisazi kumele ngenze njani, sengiphila njengenyamazane ngibaleka njengoba sengihlala kubangani nakomakhelwane ngibalekela yena,” esho ekhala.
NgeSonto, kuthiwa uyise wengane yakhe ufike endaweni yokucwala izinwele asebenza kuyo wamshaya kubuka abantu.
“Sibize amaphoyisa aseHammarsdale akhala ngokuthi incwadi yenkantolo enginayo isindala futhi akukho angakwenza ngoba lizodedelwa (isoka) ngakusasa. Angazi noma lizobuya lingihlasele yini ngoba lingisongelile lathi liyophumula sengifile,” kusho yena.
Kuvele ukuthi amaphoyisa awafunanga ukuvula icala kodwa athe azothatha isoka lalo wesifazane ukuvikela ukuthi lisondele kuyena.
Isihlobo sakhe, esicele ukungadalulwa ngenxa yokwesaba isoka, siveze ukuthi nabo basengozini.
“Asazi singamsiza kanjani uma isoka lakhe limshaya ngoba lokhu likwenza phambi kwabantu, lisabise ngokubashaya noma ngokubagwaza. Kusimangazile ukuthi amaphoyisa uma siwabiza athi kumele siqhamuke nesisombululo ngoba awasazi ukuthi azomsiza ngani. Thina sizokwenzenjani ngoba silindele amaphoyisa ukuba asivikele?” Kubuza isihlobo.
Okhulumela amaphoyisa KwaZulu-Natal uLt. Colonel Thembeka Mbele uvumile ukuthi akukho cala elivuliwe ngakho owesifazane kumele ayolivula uma eshayiwe aphathe nencwadi yasenkantolo.
Uthe bazophenya ukuthi kungani amaphoyisa enqabile ukuvula icala.
Ilungu lekomiti elilwa nobugebengu kule ndawo elinqabile negama lalo lithe bayazi ngalesi sigameko kodwa konke bakubikele amaphoyisa abefike ngeSonto.
Induna yaseCliffdale, uMnuz Sibusiso Ntinga, ithe babikelwa ngodaba lokuhlukunyezwa kowesifazane, babiza isoka lakhe kodwa langafika.
“Samcebisa ngokuthi ayofuna incwadi emaphoyiseni ngoba asikwazi ukuphoqa umuntu ukuba eze ecaleni enduneni,” kusho uNtinga.
Isoka lifonelwa izolo ucingo beluvaliwe, lithunyelelwe ne-sms ebingakaphendulwa.
Okhulumela iNPA esifundazweni, uNkk Natasha Kara, ebuzwa ngale ncwadi yasenkantolo uthe badinga isikhathi esanele sokuphawula ngayo ngoba izimantshi zisuke zisenkantolo emini.
Owesifazane utshele Isolezwe ukuthi akawuphasanga uGrade 12 ngoba isoka lalimvimba uma eya esikoleni. Lake lamdonsa izinwele elukile zashumpuka phansi esikhumbeni.
Uthe baqale ukuthandana eneminyaka engu-15, wathola umntwana ngo-2010. Ngo-2011 laqala ukumshaya.
“Kusukela ngaleso sikhathi ngizama ukuhlukana naye, angishaye aze angiklinye ethi ngeke ngihlukane naye,” kusho yena.
Uthe ubehlala nogogo wakhe, umfowabo nodadewabo, eshaywa phambi kwabo nabo basabe nokuphuma endlini. Uthe yingane yakhe eneminyaka eyisikhombisa ebilamula uma eseshaywe kakhulu.