Kubulawe abasolwa ngokugqekeza imizi
KUBULAWE abahlanu abasolwa ngokuba yizigebengu ezingongqondongqondo ekugqekezeni imizi, eKloof ngasePinetown ngaphandle kwaseThekwini, izolo.
Kube nesiminyaminya esithathe amahora acela kwamane emgwaqweni uM13, uma usuzongena edolobheni ePinetown, izimoto zingakwazi ukuhamba ngenxa yalesi sigameko esenzeke ngo-12 emini.
Okhulumela amaphoyisa KwaZulu-Natal, uColonel Thembeka Mbele uthe kushone abahlanu kwalimala oyedwa kulesi sigameko.
“Abasolwa bagqekeze omunye umuzi eKloof, bathatha amathelevishini amabili nobucwebe kwabikelwa amaphoyisa. Kubonakale iMercedes Benz emhlophe ebihamba abasolwa amaphoyisa ayijaha. Abasolwa baqale badubula amaphoyisa nawo adubula ezivikela. Imoto ebihamba abasolwa igcine ngokuphaphalaza yaphuma emgwaqweni yalala ngomhlane ehlathini. Kushone abahlanu, oyedwa udubuleke emhlane waphuthunyiswa esibhedlela lapho egadwe khona amaphoyisa,” kusho uCol Mbele.
Uthe emotweni kutholwe izibhamu ezimbili, ikhamera, amathelevishini amabili, amateku nokunye.
Kusavulwe icala lokugqekeza, kuzovulwa idokodo ngokushona kwabahlanu, ngamacala okuzama ukubulala namanye njengoba kusazohlolwa nemoto abebehamba ngayo.
Isolezwe ngesikhathi lifika endaweni yesigameko bekuvalwe umgwaqo, izimoto zingakwazi ukunyakaza. Isiminyaminya besisuka eHillcrest size singene ePinetown. Abaningi abavalelekile bebeyolanda izingane eziphuma esikoleni, nabasebenzi bephuma emsebenzini.
Izimoto zize zadedelwa abacwaninga indawo yesigameko sebeqedile ukuhlola umonakalo.
Kwenzeka lokhu nje emasontweni amabili edlule amaphoyisa adubule abasolwa abangu-10 okwakuthiwa babehlela ukuyobamba inkunzi. Kwaphinde kwadutshulwa abasolwa abayisithupha KwaMashu okuthiwa babebuya kobamba isitolo sobucwebe inkunzi.
Amaphoyisa asanda kuxwayisa abanikazi bemizi ngokuthi bangagcini ubucwebe obuningi ezindlini ngoba lokhu kwenza babe sengozini yokugqekezelwa noma bahlaselwe babanjwe inkunzi.