‘Akuqiniswe ezokuphepha kweye-ANC KwaZulu-Natal’
ILUNGU le-ANC eladutshulwa lisemhlanganweni wokukhetha ababezomela le nhlangano okhethweni lohulumeni basekhaya ngo-2016 lifuna kuqiniswe ezokuphepha uma sekunemihlangano yamagatsha yokulungiselela ingqungquthela yokukhetha ubuholi be-ANC KwaZulu-Natal ngo-Ephreli.
UMnuz Hlanganani Nxumalo (33) waseBlaauwbosch, ngasoSizweni eNewcastle, owadubuleka engalweni wafakwa insimbi, uthe kuyadingeka kuqiniswe ezokuphepha njengoba kwezinye izifunda lungekho uzinzo ngenxa yokuhlukana phakathi ngesikhathi kuyiwa engqungqutheleni yokukhetha ubuholi be-ANC eyayingoDisemba eNasrec, eGoli.
UNxumalo uthe kumele athathelwe izinyathelo ezinqala amalungu aphatha izibhamu emihlanganweni yenhlangano ukuze amalungu azi ukuthi aphephile.
“Ngadutshulwa ngomunye unogada owayegade owayezophatha umhlangano wesifunda ukuze kukhethwe ababezomela inhlangano okhethweni lohulumeni basekhaya. Owayezohlalisa umhlangano wayengathunyiwe ubuholi wayezizele nje. Wayelibeka ngembaba elokuthi umhlangano uzohlala noma kuthiwa kunabantu abambalwa, noma abanye bengaphandle,” kusho uNxumalo.
Ukusho lokhu izolo ethula ubufakazi kwikhomishini kaMoerane eThekwini ephenya ngokubulawa kosopolitiki esifundazweni.
Uthe ngesikhathi edubuleka wayeyozama ukubuza ukuthi ngungani unogada wayehilizisana nelinye ilungu elalaziwa ukuthi leseka uMnuz Cyril Ramaphosa ukuthi ahole.
Uqhube wathi wake wahambisana nohlangothi olwalweseka uDkt Nkosazana Dlamini Zuma kodwa wabuye washintsha waseka uhlangothi lukaRamaphosa, osengumengameli wezwe.
“Unogada wayehilizisana nelinye ilungu eleseka uRamaphosa. Ngathi ngiyasondela ngifuna ukuthola ukuthi kubangwani, lahlohla isibhamu langidubula. Ngahlala izinyanga ezintathu esibhedlela ngafakwa nensimbi engihluphayo uma kubanda.”
Uthe wayephume ehholo ngoba efuna ukuyobheka ozakwabo ababevalelwe ngaphandle njengoba kwakuqhubeka ukuvota ngaphakathi.
“Akumele izibhamu ziphathwe emihlanganweni yenhlangano. Kumele siphephe uma sisemihlanganweni,” kusho uNxumalo.
Uthe kusekhona ukwesaba ikakhulu njengoba kuzoba nemihlangano yokukhetha ubuholi kulungiselelwa ingqungquthela yesifundazwe engo-Ephreli.
“Isifunda eMalahleni sagcina ngokuhlakazwa ngoba sasihambisana noRamaphosa. Siyethemba kuzoba nokuthula ngoba ingqungquthela seyadlula, uRamaphosa usiphethe sonke.”
Uthe ngesikhathi elimala wayenza umsebenzi wokucosha amaphepha endaweni ngaphansi kohlelo i-Expanded Public Works Programme.
Uqhube wathi unogada wake wafika ezoxolisa efuna ahoxise necala.
“Wathi uzonginika uR10 000, noma uR20 000 ukuze ngihoxise icala, siyixoxe le ndaba ngaphandle kwasenkantolo. Wathi angicabangisise kahle ukuthi ngifuna malini. Icala kulindeleke ukuthi lingene ngoJuni kulo nyaka,” kuqhuba uNxumalo.
Uthe ngesikhathi esesibhedlela walulekwa ngokuthi icala lakhe akafune ukuthi liphenywe esiteshini samaphoyisa eNewcastle ngoba kwesendawo kusolwa ukuthi idokodo lakhe lalizoduka.
USihlalo wekhomishini, u-Adv Marumo Moerane, umeluleke ngokuthi athole ukwelulekwa ngokwezomthetho.
Namhlanje kuzofakaza amaphoyisa eSAPS.