Okwethulwe aphikisayo kuRamaphosa
UMENGAMELI Cyril Ramaphosa ufakelwe ingcindezi abaholi bamaqembu aphikisayo abathi akaxoshe ongqongqoshe abathinteka embikweni wokulawulwa kombuso yidlanzana elifuna ukufeza izinhloso zalo nokuthi anciphise iminyango kahulumeni.
Izolo abamaqembu aphikisayo bathe uRamaphosa kufanele afeze isithembiso sakhe sokulwa nenkohlakalo futhi angavikeli osopolitiki abasolwa ngenkohlakalo.
Umholi weDA , uMnuz Mmusi Maimane, ukwamukele ukuzibophezela kukaRamaphosa ekulweni nenkohlakalo wathi osekusele manje wukuthi anciphise iKhabhinethi yakhe ngokwehlisa isibalo songqongqoshe abangu-35.
“Kungenzeka ukuthi kuncishiswe ongqongqoshe kwiKhabhinethi kube neminyango engu-15. Lokhu kungafukula umnotho, kuphinde kwakhe amathuba omsebenzi. Kuzosiza uhulumeni ukuthi onge uR4.7 billion ngonyaka,” kusho uMaimane.
Uthe uma uRamaphosa ezimisele ngokulwa nenkohlakalo uzoxosha oNksz Bathabile Dlamini, Faith Muthambi, Lynne Brown, oMnuz Mosebenzi Zwane, Malusi Gigaba, Des van Rooyen, David Mahlobo noBongani Bongo.
Umholi we-EFF, uMnuz Julius Malema, uthe akaqondi ukuthi kungani uNksz Muthambi esengungqongqoshe.
“Angisiboni isizathu sokwenziwa kwakhe ungqongqoshe, wumholi onjani owenza uNksz Faith Muthambi ungqongqoshe ashiye umuntu ofana noNkk Thoko Didiza?” kubuza uMalema.
Naye uthe uRamaphosa akumele amoshe isikhathi kodwa akachithe ongqongqoshe abangawenzi umsebenzi njengoba enzile kwa-Eskom.Umholi we-UDM, uGeneral Bantu Holomisa, uthe inkohlakalo edla lubi beyenziwa ngabaholi abazitshela ukuthi banamadla adlula wonke umuntu.
“Mengameli kufanele bajeziswe abalahlwa ngamacala enkohlakalo,” kusho uHolomisa.
UNkk Phumzile van Damme uthe uhlabeke umxhwele ngokuzibophezela kukaRamaphosa ekulweni nenkohlakalo.
“Akufanele kujeziswe abasebenzi bakahulumeni kuphela ngokuxhashazwa kwemali eminyangweni kodwa nosopolitiki kufanele bajeze ngokweba imali yabakhokhi bentela,” kusho uNkk van Damme.
Uthe kufanele kushushiswe uMnuz Jacob Zuma kuqala.
“Sifuna ukubona uMengameli Ramaphosa eyisibonelo esihle ngokwenza lokho akushoyo. Kufanele ajezise noMnuz Zuma osebenzise izigidi ebalekela ukushushiswa yizinkantolo,” kusho uNkk van Damme.
Uthe noNobhala Jikelele ophinde abe nguNdunankulu waseFree State, uMnuz Ace Magashule noMnuz Mosebenzi Zwane kufanele bashushiswe. Naye uvumelane nozakwabo ethi kufanele kuxoshwe uNksz Muthambi noBrown.
UMnuz Jackson Mthembu, onguSotswebhu we-ANC, uthe abaholi abasePhalamende kufanele babe nesimilo nenhlonipho.
“Uma abaholi benesimilo nenhlonipho sizophumelela siyizwe. I-ANC ithembisa abantu baseNingizimu Afrika ukuthi izoyiqeda nya inkohlakalo kuhulumeni nasezinkampanini ezizimele,” kusho uMthembu.