Ubanjiswe esokuphatha umsakazo
UMPHATHI wezokumaketha osanda kuqokwa kuKhozi FM, uSbongi Ngcobo, usebanjiswe isikhundla sokuphatha umsakazo. USbongi ungene esikhundleni ngemuva kokuthi obesiphethe, uBonga Mpanza esabambe kwesokuba umphathi wesifunda eSABC KwaZulu Natal kulandela ukuthatha umhlalaphansi kukaZamambo Mkhize.
Ethintwa uSbongi obezwakala ethokozile uthe ufikelwa wumoya wokuzithoba ngokunikwa isikhundla esisha. Uthembisa ukuthi uzosihlonipha futhi asiphathise okwezikhali zamaNtungwa.
Ekhasini loKhozi FM ku-Instagram kufakwe isithombe sikaDudu Khoza naye uSbongi besemcimbini kumasipala waseMbizana.
Kulesi sithombe kubhalwe ukuthi: “ULady D ubekhuluma neMeya yaseMbizana ehambisana nobambe njengomphathi siteshi womsakazo wethu, uSbongi Ngcobo”.
USbongi uthe kuyisibusiso ukubanjiswa isikhundla.
“Ngihlele ukuqhubeka nokulandela izibopho zakwaSABC ezimbili nezinkulu zoKhozi, okuwukukhulisa abalaleli nenzuzo yesiteshi,” kusho uSbongi.
Uthe uzokwenza isiqiniseko sokuthi uKhozi luyaqhubeka nokuhamba phambili kuyo yonke into oluyenzayo.
USbongi ujoyine uKhozi ngoNovemba esuka esiteshini
esisesitebeleni seSABC, iTru FM ese-Eastern Cape. Uzalelwe KwaDukuza wakhulela eGroutville naseSikhaleni. Uneziqu zeBA in Media Studies. Uke wasebenza kwiGagasi FM ngaphambi kokuya kwiTru FM.
Okhulumela iSABC, uKaizer Kganyago, uthe ubengakezwa ukuthi kukhona osebekiwe.
“Vele bekudingeka kube khona ozovala isikhala sikaBonga ngemuva kokuhamba kukaZamambo Mkhize. Bengingakabi naloke ulwazi lokuthi uSbongi usebambile kulesi sikhundla,” kuchaza uKaizer.