Kumi ngomumo ngeyesabelomali
KONKE sekumi ngomumo mayelana nokwethulwa kwesabelomali sezwe nguNgqongqoshe wezeziMali uMnuz Malusi Gigaba.
UGigaba namhlanje ngo-2 ntambama uzokwethula isabelomali ePhalamende.
Uthula lesi sabelomali nje bekunokudideka nokwesaba ukuthi kungenzeka angasethuli ngoba bekulokhu kuvela imibiko ethi kungenzeka akhishwe kulesi sikhundla nguMengameli omusha uMnuz Cyril Ramaphosa. Kodwa i-ANC iqinise abantu idolo ngokuthi nguGigaba ozokwethula isabelomali.
Likhuluma nabezindaba izolo iPhini likaGigaba, uMnuz Sifiso Buthelezi, libhoke ngolaka abezindaba bebuza ukuthi nguGigaba ngempela yini ozokwethula isabelomali.
“Ngicabanga ukuthi lo mbuzo awunabo ubulungiswa akekho owayizo ukuthi kuzokwenzekani futhi niyazi ukuthi ukuqokwa nokukhishwa kongqongqoshe kulele emahlombe kamengameli,” kusho uButhelezi.
Uthe i-ANC ikucacisile ukuthi nguGigaba ozokwethula isabelomali.
Izolo, uGigaba wethule ngokusemthethweni uhlelo olusha lwe-online ngenhloso yokwenza isiqiniseko sokuthi abantu bayakwazi ukufunda kabanzi ngesabelomali.
Uphinde wethula uhlelo iVuleka Mali okuthiwa luzosabalalisa umnotho kuwo wonke umuntu.
UGigaba uthe bonke abantu manje sebezokwazi ukuthola baphinde bafunde ngesabelo-mali kalula.
Kulolu hlelo lwe-online nomphakathi uyakwazi ukufaka umbono wawo ngesabelomali.