Ululeka uBenni afunde ukufela ngaphakathi
ISITOBHA seCape Town City, uVincent Kobola, sidonse ngendlebe umqeqeshi waleli qembu, uBenni McCarthy, ukuthi akafunde ukufela ngaphakathi ebhentshini noma izinqumo zonompempe zingahambisani nabo.
UKobola, oyibamba emuva kwesokudla, ungomunye wabadlali okwakhelwe phezu kwabo iThe Citizens besuka kwiMpumalanga Black Aces emuva kokuthi ithengwe nguJohn Comitis wayishova eKapa. Nakuba engasasitholi ngokwanele isikimu ngenxa yokwenza kahle kukaThamsanqa Mkhize kodwa uMcCarthy uke wakhuluma ngaye ukuthi useyawuqonda umsebenzi wakhe eqenjini.
Ngempelasonto iCity ihlulwe yiKaizer Chiefs emdlalweni we-Absa Premiership eFNB Stadium, eNasrec. Lona bekuwumdlalo lapho uMcCarthy abe sazama ukuzinza ngawo emuva kokukhonjwa ngaphandle ngunompempe bebhekene ne-Ajax Cape Town eqeqeshwa nguMuhsin Ertugral.
“UBenni usemusha kwezokuqeqesha. Kwesinye isikhathi unyukelwa wumoya. Kodwa asimgxeki, simjwayele. Uyasithethisa nasejimini ukuze sithathe izinqumo ezifanele ngoba kwesinye isikhathi asenzi izinto asuke esitshele zona bese eyacasuka. Ngakho asimsoli. Uyabavikela abadlali bakhe,” kusho uKobola.
“Kwesinye isikhathi uyakhuluma nathi, axolise, athi kuyenzeka ngihluthuke kodwa ngizozama ukuba nesineke. Awudingi umqeqeshi wakho ukuthi alwe nonompempe ngoba yibona abaphethe umdlalo. Kumele afunde ukubhekana nezimo noma ngabe ucasukile.
“Kufanele athule, abeke umoya phansi. Kwesinye isikhathi onompempe kufanele ubaphathe kahle ngoba uma ungakwenzi lokho, ulokhu ubathethisa, bafuna ukukukhombisa ukuthi kungawina noma yiliphi iqembu. Angisho ukuthi onompempe bangenza sihlulwe kodwa uma ubacasula bangaqoka ukukukhipha ngaphandle. Uma umqeqeshi esengaphandle, ubani ozoqeqesha iqembu.”
UMcCarthy akuyena yedwa umqeqeshi kwi-Absa Premiership ozwakalise ukungeneliseki ngonompempe. UPitso Mosimane opheka iMamelodi Sundowns naye ukhale esifanayo emasontweni adlule ngoVictor Gomes omkhombe ezihlweleni bebhekene neThe Citizens. UMosimane utshele abezindaba ukuthi uGomes uhlala efuna ukuba wunontandakubukwa njengesakabuli.
Nakuba kuyisizini kaMcCarthy yokuqala kwi-Absa Premiership kodwa ufike wayibamba ishisa. Iqembu lakhe lidlulele kwiLast 16 yeNedbank Cup lapho lizobhekana ne-Orlando Pirates.
“Sisebenza njengeqembu, sibambisene. Akukho ukuthi lo mdlali uqhamuka eKapa, lona uqhamuka eGoli. Siwumndeni, senza izinto ndawonye,” kusho uKobola.
“I-Pirates idlala ibhola elihle. Kodwa thina sifuna ukufinyelela kowamanqamu weNedbank Cup. Sizoqala ngePirates. Lokho asinandaba nakho. Sizobathwesa ubunzima, ikakhulukazi njengoba sizodlalela eKapa. Ngabe sikhuluma okunye ukuba umdlalo uzoba se-Orlando ngoba banzima khona.”