Isikhalo sikaGigaba ngeyabakuhulumeni

UNGQONGQOSHE wezezimali uMnuz Malusi Gigaba usexwayise ngokuthi ukunyuka kwemali ekhokhelwa izisebenzi zikahulumeni kufaka ingcindezi esabelweni sezimali.

UGigaba umemezele izolo ethula isabelomali salo nyaka ePhalamende ukuthi imali ekhokhelwa abasebenzi inyuke isuka ku-R437 billion ngo-2014 yafinyelela ku-R587 billion kulo nyaka wezimali.

Uthe imali ekhokhelwa abasebenzi izonyuka ngo-7.3% eminyakeni emithathu ezayo okuzofaka enkulu ingcindezi esabelweni sezimali.

Izingxoxo zamaholo nezinyunyana zingaba nomthelela esabelweni sezimali.

Umqulu, iBudget Review, uveze ukuthi imali ekhokhelwa abasebenzi izonyuka ifinyelele ku-R677 billion eminyakeni emithathu ezayo. Uthe uhulumeni uchitha cishe u-35% wesabelomali ekukhokheleni abasebenzi bakhe.

UGigaba uthe kudingeka kunqandwe lokhu.

“Kudingeka uhulumeni anqande ukwenyuka kwemali ekhokhelwa abasebenzi. Uhulumeni usebenza kanzima ukuqinisekisa ukuthi izingxoxo zamaholo ziba sezingeni kungabi nabazokhala. Lolu hlelo ludinga ukuthi kube nokubambisana kuzona zonke izinhlaka,” kusho uGigaba.

Okhulumela iCosatu, uMnuz Sizwe Pamla, uthe uhulumeni usuvele wehlise ekuqashweni kwabasebenzi ngo-3% eminyakeni emibili edlule wathi othisha nabahlengikazi yibona abashayeka kakhulu.

Uthe buyanyuka ubugebengu kodwa kwehliswa isibalo samaphoyisa.

“Othisha babhekene nesibalo esikhulu sabafundi emakilasini njengoba befundisa abangu-60 kuya ku-100. Uhulumeni ufuna ukugqilaza abasebenzi kodwa kuyanyuka ukusetshenziswa kwemali osopolitiki futhi ziyavalwa nezikhala eziphezulu kuhulumeni nasezinkampanini ezingaphansi kukahulumeni,” kusho uPamla.

UPamla uthe uhulumeni uyaqhubeka nokungazivali izikhala ezibalulekile kodwa eminye iminyango kahulumeni njengowezobudlelwano namazwe angaphandle uhlela ukusebenzisa u-R2 billion ukulungisa izindlu zamanxusa.

Khonamanjalo uhlelo lokuhlinzeka umphakathi ngezempilo iNational Health Insurance (NHI) lugixabezwe ngoR4.2 billion kwisabelomali sezwe.

Lolu hlelo luhlose ukusiza wonke umuntu ngezempilo ngisho noma ngabe kuthiwa akanamali.

UGigaba uthe iningi labantu lisashona ngenxa yezinga eliphansi lokuhlinzekwa ngezempilo

“Kusukela ngo-1994 uhulumeni wakuleli ezama ngayo yonke indlela ukwenza isiqiniseko sokuthi abantu bayaluthola usizo lwezempilo,” kusho uGigaba.

Uthe iNHI izosiza ihlenge impilo yabantu abaningi abagcina beshone kungafanele.

UMnuz Simon Mathe, onguNobhala Jikelele weSamwu, uthe bayakujabulela ukuxhaswa kweNHI ngoba kusho ukuthi abampofu bazokwazi ukuthola usizo lwezempilo.

Uthe kufanele kucaciswe ukuthi iqala nini ukusebenza nokuthi ama-medical aid azosebenza kanjani uma sekukhona iNHI.