Izophendulwa imifundaze eyeNSFAS
UNDABAMLONYENI wemfundo yamahhala emanyuvesi nasemakolishi amakhono yabelwe u-R57 billion eminyakeni emithathu ezayo.
Ibibhekwe ngabomvu inkulumo kaNgqongqoshe wezimali uMnuz Malusi Gigaba ikakhulu indaba yokuxhaswa kwale mfundo emenyezelwe ngowayengumengameli wezwe uMnuz Jacob Zuma ngoDisemba nyakenye.
UGigaba uthe ezemfundo yizona uhulumeni azixhasa ngemali njengoba ezotshala le mali emfundweni yamahhala emanyuvesi nasemakolishi.
“Abafundi abenza unyaka wokuqala ngo-2018, abazali babo abahola ngaphansi kuka-R350 000 ngonyaka bazofunda mahhala emanyuvesi nasemakolishi. Le mfundo izofakwa kwabanye abafundi abenza eminye iminyaka ngeminyaka elandelayo baze baqede ukufunda,” kusho uGigaba.
Uthe abafundi abebexhaswa yisikhwama sezimali, iNational Students’ Financial Aid Scheme (NSFAS) imali abebeyiboleka izophendulwa yenziwe umfundaze.
“Igxathu elibalulekile leli ukuze kuqedwe indlala nokushoda kwemisebenzi entsheni. Izibalo ziveza ukuthi ziphansi ezokuqashwa kwabafundi abaneziqu.”
Uthe imfundo ephakeme bafuna ifinyelele kubafundi abahlwempu.
Abafundi bazoxhaswa ngemali yokufunda, ukuthenga izincwadi, ukudla, imali yokugibela nendawo yokuhlala.
UGigaba uthe izonyuka imali enikwa amanyuvesi ifinyelele ku-R11.3 billion eminyakeni emithathu ezayo ukuze ixhase abafundi abanyuselwe imali yokufunda ngo-8% ngoba abazali babo behola kusuka ku-R350 000 kuya ku-R600 000 ngonyaka.
Imfundo yasemazingeni aphansi uGigaba uyabele u-R231 billion kulo nyaka wezimali.
Ukuphuculwa kwengqalasizinda ezikoleni kwabelwe u-R31.7 billion ukuze kwakhiwe izikole, kuthuthukiswe ezikhona bese kufakwa nefenisha.
Uthe le mali izosiza ukulungisa izikole ezingu-82 ezingekho esimeni sokufundela, kufakwe amanzi kwezingu-325 kufakwe izindlu zangasese kwezingu-286.
“Abafundi abangu-9 million bazoqhubeka nokuthola ukudla ezikoleni ezingu-19 800 nsuku zonke ngokohlelo iNational School Nutrition Programme olwabelwe u-R21.7billion. Uhlelo lomfundaze wabafundi abenza iziqu zobuthishela abafundiswa umfundaze iFunza Lushaka lwabelwe u-R3.7 billion kanti luzohlomulisa abafundi abangu-39 000.”
Uthe lolu hlelo luzogxila kubafundi abenza i-maths, isayensi nezobuchwepheshe. Uthe u-R15.3billion uzobekelwa ukuhlinzeka othisha nabafundi ngezinsiza kufundisa.