Uhulumeni ubeke u-R6 billion wesomiso
UHULUMENI ubeke eceleni u-R6 billion wokulwa nesomiso esihlalise lubhojozi izakhamuzi.
Ethula isabelomali sakhe izolo, uNgqongqoshe weziMali, uMnuz Malusi Gigaba, uthe imali izosiza ukubhekana nezinselelo ezidalwa wukuntuleka kwamanzi, iphinde ithuthukise nengqalasizinda.
“Ukugadla kwesomiso kuphazamisa izindawo eziningi ezweni, kuphinde kulethe izinkinga ekuhanjisweni kwamanzi kubantu abalinganiselwa ku-4 million eCape Town,” kusho uGigaba.
Uthe amanye amadolobha amancane eNorthen Cape naseEastern Cape nawo abhekene nengwadla yokushoda kwamanzi.
“INingizimu Afrika ibhekene nenkinga yokushoda kwamanzi kanti nendlela okuguquka ngayo isimo sezulu kwenza ukuthi ibe ncane imvula eba khona,” kusho uGigaba.
Uhulumeni kazwelonke uzoqhubeka nokusebenzisana nomasipala ngenhloso yokuzama ukulawula isimo sokuntuleka kwamanzi.
“Uhulumeni uhlala ekulungele ukunikeza usizo uma kunesidingo,” kusho uGigaba.
UGigaba uphinde waveza ukuthi bakhathazekile ngokulahleka kwamathuba omsebenzi kwezolimo ngenxa yesomiso esikhona
“Lokho kwenza sizame ezinye izindlela zokwenza isiqiniseko sokuthi amanzi awantuleki emapulazini,” kusho uGigaba.
Uthe bazosiza ngemali izinhlelo zokuthuthukiswa kwengqalasizinda yamanzi.
“Phezu kwesabelomali esisibekele ukulwa nesomiso, sizophinde sinike izifundazwe nomasipala u-R473 million,” kusho uGigaba.
Umthamo wamadamu amaningi amakhulu, ikakhulukazi KwaZuluNatal, wehlile ngenxa yesomiso esikhona.
Omasipala abaningi baqale uhlelo lokunciphisa ukusetshenziswa kwamanzi yizakhamuzi; kwezinye izindawo avalwa ebusuku aze avulwe emini.
Uhlelo lokuvala amanzi ebusuku ngesikhathi abantu belele lubonakala luthela izithelo.
ECape Town isimo khona simanzonzo ngangokuthi umkhandlu wakhona ungase uphelelwe ngamanzi.
Isimo kasikabi sibi ngaleyo ndlela eThekwini.