Aphikisayo asigxekile isabelomali
ININGI lamaqembu aphikisayo lisigxekile isabelomali sikaNgqongqoshe wezeziMali uMnuz Malusi Gigaba asethule izolo ntambama.
Umholi weDA uMnuz Mmusi Maimane uthe uhulumeni akakwazi ukuthi angafuna ukukhokha izikweletu zakhe ngokuthi anyuse intela ezocindezela abantu abahluphekayo.
“Uhulumeni kumele ngabe usebenzisa ezinye izindlela zokuzama ukwakha imali ngokuthi anciphise ongqongqoshe babe ngu-15, aphinde ayeke nokulokhu exhasa ngezimali amabhizinisi akhe angayenzi inzuzo ngenxa yenkohlakalo egcwele kuwo,” kusho uMaimane.
UMaimane uthe lesi sabelomali sizokwenza ibenzima kakhulu impilo yabantu abahluphekayo.
UMholi weCope uMnuz Mosiuoa Lekota uthe lesi sabelomali asibaniki ithemba abantu bakuleli ukuthi izwe lizophuma kanjani ezikweletini elinazo.
ULekota uthe into ebuhlungu manje ukuthi izikweletu zezwe sekumele zikhokhwe ngabakhokhibentela.
Okhulumela i-ACDP uMnuz Steve Swart uthe ngeke ziphele izinkinga zalapha eNingizimu Afrika uma izimali zisayiswa ezindaweni ezingafanele.
USwart uthe akunasidingo ukuthi kwenyuswe intela yezimpahla ezithengwayo ngoba lokho kuhlukumeza umphakathi.
“Sikholwa ukuthi izinkinga zezimali zikahulumeni zingaphela uma kungaliwa nenkohlakalo nokungasetshenziswa ngendlela kwezimali,” kusho uSwart.
Umholi wenyunyana iSouth African Federation Trade Union (Saftu) uMnuz Zwelinzima Vavi uchaze lesi sabelomali njengembibizane kubasebenzi.
UVavi uthe badinwe bayaveva ngokwenyuswa kwentela yezimpahla ezithengwa ezitolo i-VAT.
Uthe ngabasebenzi abazoshayeka kakhulu kulesi sabelomali.
Okhulumela iCosatu kuzwelonke uMnuz Sizwe Pamla uthe badumele ngesabelomali sikaGigaba.
Uthe lesi sabelomali asinalo uhlelo lokudala amathuba emisebenzi.
UMengameli we-IFP Inkosi Mangosuthu Buthelezi usincomile lesi sabelomali wathi sikahle kakhulu.
“Kungijabulisile ukuzwa ukuthi izonyuka futhi imali yezibonelelo esiza imindeni eminingi ukuthi ilale idlile,” kusho uButhelezi.
Uphinde wancoma ukuthi uGigaba wenze kahle ukuthi ayicacise indaba yemfundo yamahhala ezikhungweni zeMfundo ePhakeme njengoba bekunovalo lokuthi imali izovelaphi.
UButhelezi ukhale ngokuthi alukho uhlelo olukhona lokudala imisebenzi olwethulwe nguGigaba.
Uphinde wazwakalisa ukukhathazeka ngezikweletu zezwe, wathi ziyisa izwe eweni.
USihlalo we-ANC uMnuz Gwede Mantashe naye uhambe emazwini kaButhelezi wasincoma isabelomali sikaGigaba.
UMantashe uthe uGigaga uthinte izinto ezibalulekile uma ekhuluma ngezibonelelo waphinde wenza isiqiniseko sokuthi zizoqhubeka nokuhlinzekwa nguhulumeni ngaphandle kokuphazamiseka.
USotshwebhu we-UDM uMnuz Nqabayomzi Kwankwa uthe isabelomali sikaGigaba sikhombisa ukuthi izwe lisesimeni esinzima.