Libulawe lisemotweni iphoyisa
UFUNA kuboshwe abasolwa umndeni wephoyisa likaMasipala elibulawe lisemsebenzini ngoLwesibili ebusuku.
UConstable Sipho Khanyile (50) waKwaMashu, eThekwini, ubulawe emgwaqweni, u-R102 ngaseMount Moriah, ePhoenix.
UKhanyile kuthiwa ubemi erobhothini umbulali emhlasela.
Kuthiwa uficwe emotweni iVW Golf eluhlaza efake wonke umfaniswano womsebenzi ngabo 9 ebusuku esebulewe, isibhamu somsebenzi siseduze kwakhe edutshulwe esifubeni.
Imoto abehamba ngayo kuthiwa ibishayise ukhonkolo oseceleni komgwaqo. Kusolwa ukuthi kukhona obezama ukumduna imoto.
Umfowabo, uMnuz Sakhile Msomi, uthe bebengakholwa ukuthi useshonile baze bazidelisa emakhazeni izolo.
“Besilindele ukuthi uzobuya ekhaya emuva kokusebenza. Asikholwanga sithola ucingo ngoLwesibili ebusuku ukuthi ubengabulawa ngesihluku esingaka. Kunzima ukwamukela. Indlela esingaphola ngayo singumndeni wukuthi kuboshwe abasolwa,” kusho uMsomi.
Uthe umfowabo ushiye inkosikazi nezingane ezintathu, encane ineminyaka engu-14.
Uthe umfowabo ubeyikho konke emndenini wakhe.
“Ubewuthanda kakhulu umndeni wakhe. Ukushona kwakhe kusiphuce lukhulu. Silimele kakhulu ngokuhamba kwakhe ngale ndlela,” kusho uMsomi.
UKhanyile kuthiwa ubeseneminyaka eminingi esebenza emaphoyiseni kamasipala. Ubesebenzela esiteshini esiKwaMashu. Ngesikhathi ehlaselwa kuthiwa ubesathathe ikhefu njengoba ubengene ngo-6 ntambama emsebenzini. Ayikho into ethathiwe emotweni abehamba ngayo.
Okhulumela amaphoyisa KwaZulu-Natal, uColonel Thembeka Mbele uthe amaphoyisa asePhoenix avule icala lokubulala, akekho osaboshiwe kodwa uphenyo lusaqhubeka.
Kucelwe namalungu omphakathi angaba nolwazi ngokubulawa kwaleli phoyisa ukuba athinte namaphoyisa aseduze.