Kufunwa abaqothe amaphoyisa ngenhlamvu
UNGQONGQOSHE wamaPhoyisa uMnuz Fikile Mbalula uthembise ukuthi uzoya esiteshini samaphoyisa eNgcobo, e-Eastern Cape, okudutshulwe kwabulawa kusona amaphoyisa amahlanu izolo ekuseni.
Ngokombiko wamaphoyisa iqulu lamadoda lifike kulesi siteshi kungazelele muntu entathakusa izolo ladedela intululwane yezinhlavu libhekise emaphoyiseni abesebenza.
Kubikwa ukuthi abasolwa bathathe zonke izibhamu ebezikulesi siteshi. Amaphoyisa kule ndawo athungatha abasolwa okubikwa ukuthi bayiqulu lamadoda alinganiselwa ku-10.
Izolo, uMbalula uthe uzoya kulesi siteshi ayobheka isimo.
“Ngicela ukuthi ozakwethu (amaphoyisa) behlise umoya, ngiyazi ukuthi siphatheke kabi ngokwenzekile. Namhlanje ngicele ukuthi uGeneral Khehla Sitole azingele lezi zigebegu ziboshwe. Ngifuna bazisole ngosuku abahlela ngalo ukuhlasela amaphoyisa,” kusho uMbalula.
Unxuse amalungu omphakathi ukuthi aqaphele ngoba lezi zigebengu ziyingozi, wanxusa ukuthi abangaba nolwazi olungaholela ekutheni zibanjwe baxhumane namaphoyisa.
Ngokombiko wamaphoyisa abasolwa babulale amaphoyisa amathathu esiteshini.
“Abasolwa babaleke neveni yamaphoyisa, bathumba amaphoyisa amabili atholakale esedutshuliwe abulawa emgwaqweni,” kusho uBrigadier Vishnu Naidoo okhulumela amaphoyisa.
UNaidoo uthe nakuba bengakasitholi isizathu sokuhlaselwa kwamaphoyisa, sekutholakele ukuthi abasolwa baqhumise i-ATM endaweni eseduzane nalesi siteshi ngaphambi kokuthi bahlasele amaphoyisa.
Ukhomishana wamaphoyisa, uGeneral Khehla Sitole, uthe ushaqekile ngalesi sigameko.
“Ngishaqekile futhi ngiphatheke kabi ngokubulawa ngesihluku kozakwethu. Ngijube ithimba elinabaseshi asebemnkantshubomvu ukuthi liphenye ngalokhu,” kusho uSitole.
Uthe ngeke baphumule bengakatholwa abasolwa.