UZwane ucasule abekomiti engafiki
IKOMITI loMnyango wezeziMayini lithi lizokwenza uphenyo olugcwele ngokusetshenziswa kwamandla ombuso yidlanzana, lokhu kulandela izinsolo ezibekwe uNgqongqoshe weziMayini uMnuz Mosebenzi Zwane.
UZwane uphinde wangafika phambi kwaleli komiti, nobesekungokwesithathu engafiki kodwa wabonakala ePhalamende lapho uNgqongqoshe wezeziMali, uMnuz Malusi Gigaba, abethula khona isabelo mali sika-2018.
UZwane ubemenyiwe ukuthi avele phambi kwaleli komiti njengoba kukhona okungaqedwanga ngesikhathi lenza uphenyo ngo-Okthoba 2017.
Ngalesi sikhathi uZwane akezanga phambi kwaleli komiti ethi udaba lusengaphansi kwezithebe zenkantolo.
Usihlalo waleli komiti uMnuz Sahlulele Luzipo uthe ngeke besakwazi ukubekezelela izaba zikaZwane zokungezi phambi kwekomiti neziholela ekutheni kulokhu kuhlehliswa ukuhlala kwekomiti.
Encwadini ethunyelelwe leli komiti, uZwane uthe ngeke akwazi ukuba yingxenye yaleli komiti ngoba kumele ahambele umkhandlu wezifundazwe.
ULuzipo ucasukile ngesikhathi ethola ukuthi ngoLwesithathu belungekho uhlelo lokuhlala kwalo mkhandlu wezifundazwe athe uZwane ubanjwe yiwona.
Kwenzeka lokhu nje uZwane usanda kuhlaselwa abeChamber of Mines bemsola njengomuntu ongenalo iqiniso futhi imboni seyize yalahlekelwa nawukumethemba.
UZwane akamenywanga ezingxoxweni ebeziphakathi kukaMengameli Cyril Ramaphosa neChamber of Mines ezimayelana neMining Charter nokuhoxiswa kwecala okwesikhashana elifakwe abeChamber of Mines.