Baphoxwe yizikhulu abesikole esigcwele
BAPHOXEKILE abazali bezingane ezifunda esikoleni samabanga aphansi KwaDukuza, abebelindele abomnyango wezemfundo bazochaza ngomhlahlandlela wokulungisa ukugcwala kwabafundi emakilasini, okuholele ekutheni kumiswe ukufunda.
Abazali namalungu omphakathi izolo bahlangane eTinely Manor Primary ngethemba lokuthi kukhona ophuma emnyangweni ozobatshela ukuthi sakhiwa nini isikole njengoba kunamakilasi anabafundi abangu-120. USihlalo wesigungu sabazali uMnuz Sethembiso Ngubane uthe: “Umphakathi ufike wazolinda kwangafika muntu. Akekho noshaye ucingo ukusho ukuthi kwenzekeni. Kuyacaca ukuthi nakusasa (namuhla) ngeke izingane zibuyele esikoleni. Umphakathi uzophinde ubuye sizobonisana ukuthi kwenziwa njani,” Kusho uNgubane.
Uthe sekukaningi bethenjiswa wumnyango ukuthi kuzonezelwa amakilasi kodwa zingafezwa izithembiso. Uthe amakilasi anezingane ezisuka ku-80 kuya ku-120. Uthi othisha bayaqhubeka nokuza esikoleni kodwa akufundwa ngoba abafundi abekho. Uthe izolo amalungu omphakathi ahambe ethukuthele.
Sekuphele izinsuku eziyisikhombisa abazali nezinye izinhlaka zomphakathi zimise ukufunda kulesi sikole esinabafundi abalinganiselwa ku1 400.
UNobhala we-ANC Youth League ongomunye wabangenelele kulolu daba uMnuz Siphamandla Khumbuza, uthe balindele ukuthi umphakathi uphinde uhlangane kuboniswane ngalolu daba. Uthe bebethembe ukuthi impendulo yomnyango izoqhamuka nesixazululo kule nkinga.
Okhulumela uMnyango wezeMfundo KwaZulu-Natal uMnuz Kwazi Mthethwa uthe luyalungiswa udaba.
Uthe kwajutshwa izithunywa esifundeni ukuthi zengamele lolu daba ngokuphuthuma, okuzothi uma sekuhlangeniswe kahle umbiko bese kubikelwa zonke izinhlaka zomphakathi ezithintekayo.