Kuminze umfundi ephuma esikoleni
BAFUNA kufakwe ibhuloho lokuhamba izingane zesikole eManyameni, eMthunzini, kulandela ukuminza komfundi oneminyaka eyisikhombisa ephuma esikoleni. Abafundi banqamula emfuleni zonke izinsuku.
UNkululeko Siyamthanda Maphumulo obefunda uGrade 2 eKhanyakufikile Primary uminze ngoMsombuluko. Benodadewabo ofunda uGrade 4 nabanye abafundi besigodi iManyameni bawela umfula ukuze bafike esikoleni.
Uyise, uMnuz Thulani Maphumulo uthe imvula beyina kakhulu ngoMsombuluko, othisha base bebadedela ekuseni abafundi ukuba baye emakhaya kanti indodana yakhe izominza.
“Ngafonelwa sengitshelwa ukuthi indodana yami iminzile, bawela njalo kulo mfula uma beya noma bephuma esikoleni. Kusho ukuthi amanzi ayesemaningi ngoba ngalapho eminze khona amanzi awabi maningi ngakhona,” kusho uMaphumulo.
Okhulumela amaphoyisa KwaZuluNatal, uColonel Thembeka Mbele uthe amaphoyisa aseMthunzini avule idokodo ngokushona komuntu.
Induna yendawo uMnu Thembinkosi Biyela ithe ukungabi nebhuloho kuyinkinga njengoba kunemifula emithathu ekake izikole zakule ndawo.
“Sifuna iminyango kahulumeni ingenelele isifakele amabhuloho ilethe namabhasi okuthutha abafundi ngoba bahamba ibanga elide beya ezikoleni,” kusho uBiyela.
Okhulumela uMnyango wezeMfundo uMnuz Sihle Mlotshwa uthe benza konke okusemandleni ukuthi abafundi baphephe uma beya ezikoleni.
UMnuz Kwanele Ncalane okhulumela uMnyango wezokuThutha uthe bazothumela ithimba elizobheka udaba lwebhuloho.