Yingane (3) ebone kuqala umlilo
ZITHUTHELWE kwezinye izikhungo izingane ezingaphezu kuka-50 ezihlala esikhungweni sezingane eSherwood, eThekwini, ngemuva kokuqubuka komlilo ngoLwesibili ebusuku.
Kuthiwa yingane eneminyaka emithathu ebone umlilo, oshise isikhungo sikahulumeni iWilliam Clark/Othandweni Child and Youth Care ( Edith Benson). Ibone kuqhamuka intuthu ophahleni ngo-8 ebusuku, yabe isibikela abagadayo.
Ingxenye yesakhiwo okuhlala kuyo izingane ezincane kuthiwa iyona eshile.
Izolo uNgqongqoshe wezokuThuthukiswa koMphakathi KwaZulu-Natal, uNkk Weziwe Thusi, uhambele le ndawo nokuyilapho eveze khona ukuthi izingane baziyise kwezinye izikhungo.
“Ziwu-95 izingane ezihlala esikhungweni. Izingane ezincane eziwu-55 zihlala ngalapho kuqubuke khona umlilo. Zonke izingane ziphephile, nabasebenzi abawu-12 baphephile, oyedwa nje obenokuhileka kodwa akalimalanga. Izingane eziwu-55 zisusiwe esikhungweni zayiswa kwezinye izikhungo zethu ezine. Okwamanje ayaziwa imbangela yomlilo,” kusho uNkk Thusi.
Kule ndawo kuhlala izingane ezihlukumezekile, ezilahliwe, izintandane nezinye ezinesidingo sokuvikelwa uhulumeni.
Ungqongqoshe uthe njengoba kukhona izingane ezisusiwe kulesi sikhungo bazocela incwadi yenkantolo egunyaza lokho njengoba uma ingane isuswa lapho ibekwe khona kusuke kumele inkantolo ikhiphe imvume.
Umonakalo owenzekile kuthiwa awukaziwa ukuthi mngakanani ngoba kusenziwa uphenyo.
UNkk Thusi uthe bazobhekisisa isimo sezikhungo zabo nezikhungo abazisebenzisayo ezizimele ukuthi zisezingeni elifanele yini, lezo esezindala uthe kumele kubhekelelwe ukuthi zilungiswe.
Okhulumela amaphoyisa KwaZulu-Natal, uColonel Thembeka Mbele, ukuqinisekisile ukuthi amaphoyisa azisiwe ngokwenzekile kodwa alikho icala elivuliwe.