Babuyela enkantolo abezibhamu
BAZOBUYELA ngoMsombuluko eNkantolo yeMantshi eMadadeni abasolwa abahlanu ababhekene namacala okutholwa nezibhamu ezingekho emthethweni.
Abasolwa abahlanu baboshwe ngempelasonto kunomkhankaso wokuqeda izibhamu ezingekho emthethweni. Ubuhlelwe wuphiko lwamaphoyisa eCluster yaseNewcastle, amaphoyisa asoSizweni nawophiko olubhekelela ukuthula emphakathini.
Okhulumela amaphoyisa KwaZuluNatal, uColonel Thembeka Mbele uthe amaphoyisa aqale umkhankaso emzini okwa-F, Osizweni lapho ebophe khona umsolwa oneminyaka engu-18 otholwe nezibhamu ezimbili nezinhlamvu okungekho emthethweni.
Amaphoyisa aqhubekile aya kwa-D lapho ethole khona izibhamu ezinkulu ezinhlanu nezinhlamvu ezahlukene ezingu-325 kwaboshwa abasolwa abane.
“Izibhamu ezitholiwe zizoyiswa kohlolwa ukuthi azikaze yini zisetshenziswe kwezinye izigameko zobugebengu kuleli. Abasolwa abahlanu abaneminyaka ephakathi kuka-18 no-26 bavele enkantolo yaseMadadeni ngoMsombuluko, bebhekene necala lokutholakala nezibhamu nezinhlamvu okungekho emthethweni. Icala lizobuyela enkantolo ngoFebhuwari 26 nonyaka,” kusho uCol Mbele.
Ibamba lomkhuzi wamaphoyisa KwaZuluNatal, uMajor General Bheki langa uthe: “Imikhankaso efuze lena izoqhubeka ukuze sinciphise izibhamu ezingekho emthethweni. Lezi zibhamu zinomthelela ebugebegwini nokubulawa kwabantu. Ngeke siyeke ukusebenzisa umthetho kwabaphula imithetho yakuleli yokuphathwa kwezibhamu,” kusho uLanga.