Lihlehlele uMashi elephoyisa elabulawa lashiswa

LIHLEHLELE uMashi 1 nonyaka icala lokubulawa kwephoyisa eladuka lihamba ngemoto yalo kade liya kothenga igilosa ngoJanuwari nonyaka.

Izolo, kuvele abasolwa ababili enkantolo yeMantshi eNyoni ngecala lokubulawa kukaConstable Senzeni Msipha (33) owayesebenza esiteshini samaphoyisa eMthunzini.

Kulaba basolwa abebevele enkantolo kukhona nesoka lakhe uConstable Msipha.

Isidumbu sakhe satholwa sishisiwe emotweni yakhe ngemuva kokuthi edukile.

Icala labasolwa lihlehliselwe uMashi ukuze bakwazi ukufaka ngokusemthethweni isicelo sebheyili.

Laba basolwa basagcinwe ezitokisini.

UConstable Msipha akakafihlwa ngoba amaphoyisa asalinde imiphumela yolibofuzo ezoqinisekisa ukuthi ngabe isidumbu esatholwa emotweni sishisiwe ngesakhe ngempela yini.

Yize kungakaqinisekiswa ngokolibofuzo ukuthi umuntu owayekulemoto yilona leli phoyisa kodwa uphenyo lwamaphoyisa luholele ekuboshweni kukayise wengane yakhe oneminyaka engu-35 nowesilisa ona-32 ekusolwa ukuthi wayethengwe wuyise wengane yakhe ukuthi ambulale.

UConstable Msipha kuthiwa ngesikhathi elahleka wayekade enencwadi yasenkantolo evimbela ukuba uyise wengane yakhe asondele kuye.

Okhulumela amaphoyisa KwaZulu-Natal uLt. Col. Thulani Zwane uthe, “Icala lizobuya ngoMashi 1 nonyaka. Imiphumela yolibofuzo ngomufi beyingakabuyi,” kusho uZwane.