Umfundi (15) uxhase ngezichazamazwi
KUBATSHAZWA ubuhlakani bomfundi (15) waseRichards Bay oxhase izikole ezishoda ngezinsiza zokusebenza.
USthembiso Khumalo ofunda uGrade 10 esikoleni iBirdswood Secondary uxhase izikole ezimbili ngezichazamazwi.
Lo mfundi uthi ukwenze lokhu ngoba enentshisekelo yokubona abafundi bakuleli belangazelela imfundo.
“Ngiqale umkhankaso, iSharing Knowlege wokucela uxhaso lwezichazamazwi ezinkampanini ukuze ngilekelele abafundi abantulayo kodwa abathanda isikole,” kubeka uSthembiso.
Uthi into emgqugquzelile ukuthi enze lo mkhankaso uthisha wakhe wesiNgisi obehlezi efuna izichazamazwi kubafundi ngoba befeyila isifundo sakhe.
Ugcizelele ngokuthi akathandanga ukusebenzisana nomzali wakhe kulo mkhankaso ngoba ubefisa ukuzibona ukuthi uzokwazi yini ukuwenza ngokuzimela. “Akudingeki ukuthi ube mdala noma waziwe kakhulu ukuze wenze izinto ezinkulu. Lo mkhankaso ngisazowuqhuba ngisizwa yisipiloyini sami engisitholayo ngize ngibasize bonke abafundi engifinyelela kubo,” ephetha inkulumo yakhe.
Uthishomkhulu wesikole, uMnuz Stanley Mazibuko, uthe siqinisile isiZulu uma sithi umthente uhlaba usamila, ngoba ubengalindele ukuthi umfundi wakhe osemncane kangaka angasiza izikole obishini lokushondelwa izinsiza sebenza.
“Lokhu okwenziwe yilo mfundi kuwukuhlakanipha okukhulu, ngiyafisa nabanye babukele kuye, isikole sisashoda nangezinye izinto ngoba siseneminyaka amithathu siqale ukufundisa,” kubeka uMazibuko ngamafuphi.
Umzali walo mfundi, uNksz Lindiwe Dube, uthe uyamangala uma ingane yakhe isigila izimanga ezingaka ngoba bazi kuthi iyingane enamahloni.
Uthi nakuba ingane yakhe ingafuni ayeseke kodwa njengomzali ngeke athule futhi angayikhuthazi uma yenza into enhle kanje.