Amaphoyisa aphula umthetho azoboshwa wonke — Mbalula
UNGQONGQOSHE wamaPhoyisa uMnuz Fikile Mbalula, uthi azoboshwa wonke amaphoyisa aphula umthetho ngoba kufanele abe yisibonelo esihle emphakathini.
UMbalula usho lokhu ngoLwesibili ngemuva kokuthi owayenguKhomishana wamaphoyisa eWestern Cape, elahlwe ngecala lenkohlakalo.
NgoMsombuluko, u- Arno Lamoer ulahlwe ngecala lenkohlakalo kanti amacala amabili kushushumbisa imali amthethile. Ubebekwe icala lenkohlakalo, namabili okushushumbisa imali noBridagier Darius van der Ross, Brigadier Collin Govender nosomabhizinisi uMnuz Salim Dawjee bobathathu balahlwe ngecala lenkohlakalo.
Enkantolo kuvele ukuthi uLamoer wathola u-R75 000 kuDawjee owayemnika izipho phakathi kuka-2011 no-2013.
Kuthiwa ngaphandle kwezipho uDawjee wayebuye agwazele uLamoer nethimba lakhe ngokubarentela izimoto uma bevakashile, abakhokhele amaholidi asezindaweni zomntakabani, akhokhele i-akhawunti yezimpahla kaLamoer nokunye okuningi.
UVan der Ross wathola ukheshi onguR7 324 kanti uGovender yena wathola uR192, 260.
UMbalula uthe amaphoyisa kufanele ahloniphe ibheji lawo alandele umthetho, angavumi ukulingwa yizigebengu ezinemali.
“Ukulahlwa yicala kukaLamoer kukhombisa ngokusobala ukuthi umthetho uyasebenza ngoba sibopha ngisho amaphoyisa ethu. Wonke amaphoyisa aphula umthetho kufanele alibambe lingashoni ngoba sizowabopha futhi nezinkantolo ziwashushise bese evalelwa ejele,” kusho uMbalula.
Uthe amaphoyisa kufanele akhumbule ukuthi umsebenzi wawo uwubizo lokuvikela umphakathi, angalokothi avume ukugwazelwa nokunikwa imali ngabantu abakhohlakele.