UVilane uhlela ukuphindela kwi-Everest
NGESIKHATHI esakhula uMnuz Sibusiso Vilane, wayehlala esemaqeleni elusa izimbuzi njengoba zonke izinsuku wayegada imfuyo yakubo eSwazini.
UVilane (47) uthi waqala lapho ukuxhumana nemvelo kwakheka uthando lokuqwala izintaba nokufuna ukwazi kabanzi ngezemvelo.
Uqale ukuqwala izintaba ngo-1996 kanti ungomunye wabaqwali bezintaba abambalwa asebefike esicongweni sezintaba eziyisikhombisa eziphakeme emhlabeni jikelele.
Waba ngumuntu wokuqala omnyama ukufinyelela esicongweni sentaba iMount Everest kabili ehamba ngemizila ehlukene.
Uyiqwalile nentaba ephakeme kunazo zonke e-Afrika iMount Kilimanjaro wafinyelela esicongweni sayo izikhawu ezingu-18.
Njalo ngoJulayi uvamise ukuqwala le ntaba njengoba kusuke kugujwa iMandela Day futhi kuxhaswa namantombazane afunda isikole avamise ukushoda ngemisubelo.
Uzophinde azame ukuqwala iMount Everest okwesithathu.
“Ngithola umdlandla uma ngibuka izihlahla nezilwane zasendle noma ngihamba emaqeleni. Ngivele ngizizwe ngenye indlela emoyeni. Ngiyazithanda izintaba nemvelo yingakho ngingumqwali wazo,
“Uma ungaphandle uyabona ukuthi awuyilutho, lokhu ngikufunde ngesikhathi ngiseSouth Pole ngoba nganginomqondo wokuthi angifuni ukufa,” kusho uVilane.
Uthe njengoba efisa ukubuyela eMount Everest okwesithathu ufuna ukuzihlola ukuthi usakwazi yini ukumelana nemvelo.
Kuzomthatha izinyanga ezimbili ukufinyelela esicongweni seMount Everest, uthi lokhu kuzomkhombisa ukuthi umzimba wakhe usakwazi yini ukumelana nale ntaba njengoba sekuphele iminyaka engu-15 agcina ukuyiqwala.
Wayehlele ukuqwala iMount Everest ngo-2014 kodwa wahluleka wukwenza lokhu ngenxa yokuthi yayivaliwe emuva kokuthi kube nengozi kuyona.
“Ngifuna ukuvala isikhala esibe khona ngemuva kokuqwala le ntaba. Uma ngihluleka kuyobe kungenxa yomzimba wami noma kuzobe kunengozi. Ngiyathemba ukuthi kulokhu isimo sezulu sizoba sihle kube wukuthi wumzimba wami kuphela okumele ungithwale,” kusho uVilane.
Uthi uzothatha isikhathi sakhe angajahi ukufinyelela esicongweni.
“Ngithola esinye isipiliyoni njengoba ngikhula futhi ngikhaliphile uma sengiqwala izintaba. Ngiyaqaphela futhi angisajahi kakhulu. Ngizolalela umzimba wami ukuthi ufuna ngiyiqwale kanjani i-Everest,” kusho uVilane.
Uthe uzosebenzisa umzila ayewusebenzise ngesikhathi eqwala iMount Everest okokuqala.
“Ngangimncane ngesikhathi ngiqala ukuqwala i-Everest, ngiyathemba ukuthi kulokhu ngizobe ngingatatazeli ngizokwenza izinto ngohlelo. Ngiyathemba ngizojabulela konke engizokubona,” kusho uVilane.
Uzobe ehola ithimba baze bafinyelele endaweni lapho kuqalwa khona ukuboshwa izintambo ngaphambi kokuqwala intaba (base camp). Kule ndawo kubekwa nokudla futhi yiyona ndawo esuke iphephile uma kuqwalwa izintaba.
“Ngizokwenza isiqiniseko sokuthi abantu babona izinto abangazazi ngaphambi kokuthi ngiqhubeke nokuqwala intaba. Ngizoqinisekisa ukuthi ngivaleliswa kahle,” kusho uVilane ehleka.
Yize uVilane elolongeke ngendlela efanele ukuthi aqwale intaba kodwa uthi lo msebenzi ungenziwa yinoma ngubani ngoba kufanele umuntu azitshele ukuthi uzomelana nanoma yini.
“Ngikholwa wukuthi sonke sinikezwe imizimba ekwazi ukumelana nanoma yisiphi isimo. Ngazitshela kudala ukuthi umzimba wami unamandla okubhekana nezimo ezihlukene. Yonke into idinga uzilungiselele ngokufanele. Ngiyazilolonga futhi ngisebenza kanzima ngaphambi kokuqwala izintaba,” kusho uVilane.
Uthe ukuzilungiselela i-Everest akagcini ngokugijima zonke izinsuku kodwa ulolonga nomqondo wakhe.
“Akumele uyithathe kancane intaba. Ngilolonga umqondo wami ukuthi ulindele nanoma yisiphi isimo. Ngicabanga ngezigameko ezinzima ngizibuze ukuthi ngingaphuma kanjani kuzo uma sezingehlela,” kusho uVilane.
Uthe zonke izintaba zinezingqinamba zazo ngakho ayikho okumele ithathwe kancane.
Uthi intaba obekunzima ukuyiqwala yiMount Kenya kanti ayithole ilula yiMount Kilimanjalo. Yize iKilimanjaro kwakulula ukuyiqwala kodwa wehlelwa yisigameko esibi kuyo ngo-2016 ngesikhathi kushona umshayeli wezimoto zomjaho ababehamba naye, uGugu Zulu, besohambweni lweTrek4Mandela.