Ayiphele inkombankombane ngolwaseGlebe
INKINGA yokuqothwa kwabantu nobugebengu okudlangile ehostela laseMlaza iGlebelands kubukeka kusazoba wumshikashika ukuyixazulula.
Kule minyaka edlule sekufe abantu abangaphezu kuka-100 kuleli hostela kodwa namanje kusaqagelwa ukuthi ingabe ukubulawa kwabo kunenhlese yepolitiki, ukucwasa, umbango wezindlu noma wubugebengu nje.
Kwikhomishini kaMoerane ephenya ngokubulawa kosopolitiki KwaZulu-Natal sekuvele sekunenkombankombane ngokuphela kwabantu eGlebe.
Phambilini kule khomishini kuvele ubufakazi bokuthi iGlebe iyisizinda sezinkabi, yilapho zizitapela khona izigilamkhuba ezisuke zibopha itulo lokubulala osopolitiki nosomatekisi.
NgoLwesibili kodwa kade kufakaza ubuholi bamaphoyisa akwaSAPS KwaZulu-Natal, akuphikisile lokhu athi ukubulawa kwabantu kuleliya hostela kungenxa yezinga eliphezulu lobugebengu obubangelwa yindlela ihostela elakhiwe ngalo.
UMajor General Dumezweni Chiliza ufakaze wathi akukho bona abakwaziyo ngokuthi izinkabi zilandwa eGlebe wagcizelela ukuthi ukuba namahontshi okuba mnyama kuwo ngisho emini, yikho okwandisa ubugebengu.
Kuyaxaka-ke nokho okubuye kwashiwo wuChiliza kokuthi ngisho ungatshala amaphoyisa amaningi kangakanani eGlebe zizolokhu ziqhubekile izigameko zobugebengu kuleli hostela ngenxa yendlela elakhiwe ngayo.
Ngabe lokhu kusho ukuthi amaphoyisa avele atshalwe eGlebe kasikho yini isidingo sawo?
Akuwona yini amaphoyisa okufanele ukuthi uma esezibonile izimbangela zobugebengu ebese eqhamuka namaqhinga okulwa nabo?
Inkulumo kaChiliza siyibona inobudedengu futhi ilahlekisa ngethemba lokuthi amaphoyisa angayixazulula inkinga yobugebengu kuleli hostela.
Kumele kuphele ukukhombana ngokuqothwa kwabantu eGlebe kutholwe isixazululo salobu bugebengu nobulwane, noma ngabe iyiphi imbangela yakho.