Umkami akangethembi ungisola ngezinto engingazazi
EZOTHANDO
UMBUZO: Ngiphatheke kabi kakhulu Mo noPhindi. Sengike ngabamba umyeni wami nomuntu wesifazane. Salukhuluma udaba ngagcina sengimxolele. Manje usengijikele esiswini njengotshwala uthi akangithembi. Uthi wesaba ukuthi ngizomshintshela ngenze loku akwenze kimina. Uthi akakholwa ukuthi ngimxolele ngempela ngoba akulula ukuthi umuntu avele akhohlwe nje ngento enjenga le. Ukholelwa ukuthi ngiyoziphindiselela ngelinye ilanga. Sengikhathele ukukhuluma naye into efanayo. Sengakudlulisa konke enhlizweni yami. Igama Ligodliwe,
eMagabheni Impendulo: Kubukeka sengathi umyeni wakho usezitshele nje ukuthi akasafuni ukuba nawe. Usesebenzisa ukungathembeki kwakhe njengendlela yokucasha. Ngakho sibona ingekho indlela ongamkhombisa ngayo ukuthi uyamxolela ngaphandle kokuthi akholwe lokhu okushoyo. Uma eneqiniso kwinkolelo yakhe yokuthi isenzo sokungathembeki emshadweni yisilonda esingapholi, ngabe uyakhuluma nabanye abantu abadlule kulokhu emishadweni yabo ukuze nithole ukuthi bona baphuma kanjani. Yingakho sicabanga ukuthi usesithathile isinqumo sokuthi akasafuni ukuba kulo mshado. Zibuze nawe ukuthi kungani ekholwa wukuthi uzoziphindiselela ngelinye ilanga? Kungabe kukhona yini okwenzayo okumenza acabange ngale ndlela? Zinuke amakhwapha nawe ngalokhu. Umbuzo:
Ngigane ngoDisemba odlule. Umyeni wami uhlezi engithethisa maqondana nokungcola komuzi wethu. Sinengane eyodwa eneminyaka emibili futhi sihlala neyomzala wakhe eneminyaka eyisithupha. Siyasebenza sobabili futhi sibuya ekhaya sikhathele. Okwamanje asikho esimeni sokuqasha umuntu ongasebenza ekhaya ngoba asikabi nemali eyanele. Kuwumsebenzi kabani emshadweni ukwenza umsebenzi wasekhaya? Ngoba ngibona sengathi umele mina ngedwa. Dudu, eXopo Impendulo: Umshado wanamhlanje uhluke kakhulu kumshado wokhokho bethu. Yingakho abesifazane nabo sebesebenza ukusiza ngezindleko zasekhaya. Ukusizana ekhaya kukhombisa ukubambisana phakathi kwalaba abashadile. Ayikho indoda ephelelwa ubudoda bayo ngoba nakhu iyasiza ekhaya. Akukho mthetho owamiswa othi obaba mabangenzi lutho ekhaya, wukuthi nje umsebenzi wasendlini waziwa njengomsebenzi womama. Khulumani nizwane ukuthi ningabelana kanjani ngomsebenzi wasekhaya. Khohlwani ukuthi benzani abanye emizini yabo. Umbuzo: Umyeni wami wusomabhizinisi ovelele embonini yamatekisi, mina ngikhulisa abantwana ekhaya. Usiphethe kahle nabantwana umyeni wami noma emdala kakhulu nje kunami. Inkinga wukuthi angazi lutho oluhlangene nezezimali zalapha ekhaya. Angazi noma sinayo imishwalense noma cha. Angazi ngiyokwenzenjani uma kwenzeka kuba khona oshonayo phakathi kwethu. Uhlezi ethi akukona okwami ukukhathazeka ngezimali kodwa yijoka lakhe njengendoda. Ngingenza kanjani ukuze abone ukubaluleka kwalo ludaba kumina? Angifuni ukuzibona emgwaqweni nabantwana mhla edlula emhlabeni. Igama Ligodliwe,
eMkhanyakude Impendulo: Kuyinto enhle ukuthi umyeni wakho uyaninakekela nabantwana. Wenza okufanele njengendoda. Unalo ilungelo lokufuna ukwazi ukuthi ikusasa lenu njengomndeni ngokwezezimali limi kanjani. Kumele ufune isikhathi lapho ejabule khona ulihlongoze futhi lolu daba. Menze abone ukuthi yingoba ufuna ukuthi umndeni wenu unakekeleke hhayi ngoba ufuna izimali zakhe. Sikholwa wukuthi njengendoda ekuthandayo futhi ekunakekelayo uzobona ukuthi uqonde ukwakha hhayi ukubhidliza. Umbuzo: Angikaze ngikhombise ukungathembeki kunkosikazi wami nakanye kusukela sahlangana. Sinonyaka sishadile kodwa sineminyaka cishe ibe mithathu sithandana. Kodwa indlela akhombisa ukungangithembi ngayo ungafunga ukuthi kukhona angazela kona. Hleze nje engisola ngezinto engingazazi. Akumelanga ngishayelwe ucingo ngumuntu wesifazane angamazi, kuvele kusuke umsindo. Ngikhathele wukusolwa ngokungathembeki ekubeni ngazi kahle kamhlophe ukuthi ngimsulwa. Kuzogcina sekutshaleka imbewu yokungathembeki uma eqhubeka nokwenza lento ayenzayo.
Bhekumuzi, KwaHlabisa
Impendulo: Akumnandi neze ukusolwa ungenzanga lutho. Kuyenzeka omunye angakuthembi ngenxa yobudlelwano aphuma kubo nomuntu obengathembekile kuye. Kungumthwalo wakho njengendoda ukufunela umkakho usizo kunokuthi umsole. ■Facebook: Mo & Phindi Instagram: Mo & Phindi Email: info@moandphindi. com