Babuyela enkantolo abomgunyathi
BAZOBUYELA eNkantolo yeMantshi yaseShowe kusasa abasolwa abahlanu abasolwa ngokuba wongqondongqondo ekukhwabaniseleni amagaraji kaphethroli ngamakhadi asebhange.
Laba basolwa abaneminyaka ephakathi kwengu-23 no-40 zibakhalele emuva kokuthi amaphoyisa abelandela umkhondo ngalolu hlobo lokukhwabanisa.
Ngokuthola kweSolezwe abasolwa bebethola umuntu osebenza egaraji bese beyamnxenxa ukuthi asebenzisane nabo. Umsebenzi wasegaraji kuthiwa bebemnika amakhadi asebhange bese uma umuntu ekhokha ngokheshi, lo msebenzi athathe imali ayigcine, asebenzise ikhadi alinikwe ngabasolwa. La makhadi kuvela ukuthi bekungawomkokotelo.
Okhulumela amaphoyisa KwaZulu-Natal, uColonel Thembeka Mbele uthe basazoqhubeka nophenyo yize sebebophe abahlanu.
“Abasolwa bagcinwe ezitokisini kuze kube icala liyabuya enkantolo ngoLwesihlanu,” kusho uColonel Mbele.
Khona manjalo amaphoyisa ase-Mariannhill adubule abulala owesilisa (30) obesolwa ngamacala okubamba inkunzi amalungu omphakathi uma ephuma emsebenzini.
Amaphoyisa aphenya icala lokuzama ukubulala, kuvulwe idokodo ngokushona komuntu nokuphatha isibhamu esingekho emthethweni.
NgoLwesibili ekuseni, amaphoyisa aseMariannhill aye kubo kamsolwa okuthiwa ubefunwa ngamacala okubamba inkunzi. Aveze ukuthi ngesikhathi efika emcela kube khona ukudubula okuvele endlini nawo abe esedubula kwashona umsolwa. Omunye umsolwa okuthiwa ubehamba naye uma kubanjwa inkunzi, kuthiwa uboshiwe. Ubekwe icala lokutholwa nesibhamu esingekho emthethweni nelokuzama ukubulala. Lo msolwa uzovela eNkantolo yeMantshi ePinetown maduze.
Khonamanjalo, ugwetshwe iminyaka engu-30 ngamacala amabili okubamba inkunzi olahlwe yicala lokubamba inkunzi imoto yonogada ethwala imali, eShowe ngo-2016.
UBonginkosi Nxumalo (33) ugwetshwe yinkantolo yesiFunda eShowe. Ngaphezu kweminyaka engu-30 uphinde wagwetshwa iminyaka engu-15 ngokuzama ukubulala neminye emihlanu ngokutholwa nesibhamu esingekho emthethweni.
Kuthiwa ngoMashi 1, 2016 abasolwa abane bahlasela onogada benkampani Imfezi ababeyolanda imali kwesinye isitolo eShowe. Laba basolwa kuthiwa bahlula onogada ngamandla base bethatha isamba semali esingadalulwanga, isibhamu esikhulu nesincane i9mm.
Ngemuva kokuthatha imali abasolwa kuthiwa badubula, onogada baphindisela kwadubuleka umsolwa oyedwa kwasala nebhokisi lemali ababelithathile. Isigebengu esisoswa esigcine sigwetshiwe saboshwa uphiko lweTrio Task Team lesifunda iKing Cetshwayo.
Abasolwa abathathu baphunyuka babaleka. Ngemuva kophenyo, kwaboshwa abasolwa ababili abatholwa nezibhamu ezingekho emthethweni.
Laba basolwa babekwa amacala kodwa omunye umsolwa weqa ejele. Lo msolwa wabuye waboshwa kanti namanje usahamba amacala.