INumsa izobhikishela ama-labour brokers
AZOBHIKISHA ngaphandle kweNkantolo yoMthethosisekelo namhlanje amalungu eNumsa lapho kuzobe kulalelwe khona icala eliphakathi kwale nyunyana namalabour brokers.
Lo mbhikisho uzobe uholwa nguNobhala-jikelele weNumsa uMnuz Irvin Jim.
Esitatimendeni esithunyelelwe abezindaba ngokhulumela iNumsa kuzwelonke, uNkk Phakamile Hlubi-Majola, uthe ama-labour brokers adume kabi ngokuhlukumeza abasebenzi yingakho beyiNumsa sebethathe isinqumo sokuthi balwisane nawo.
“Labo abasebenza beqashwe ngama-labour brokers imisebenzi yabo ayiphephile futhi baholelwa imali encane uma kuqhathaniswa nabasebenzi abaqashwe ngokugcwele, okunye baxosheka kalula nasemsebenzini abanakho ukuvikeleka,” kusho uNkk HlubiMajola.
Inkantolo izozwa izethulo phakathi kwabameli bazona zombili izinhlangothi.
Udaba olusenkantolo olokulawulwa kwama-labour brokers wumthetho wakuleli njengezinye izinkampani eziqashe abasebenzi.
UNkk Hlubi-Majola uthe inhloso yokufaka lolu daba enkantolo ukuyiqeda indaba yama-labour brokers ngoba adlala ngabantu.
Uthe umthetho wakuleli uthi abasebenzi kumele babe ngamatoho izinyanga ezintathu, kuthi ngaphezu kwalokho bese beqashwa ngokugcwele kodwa ama-labour brokers wona awawuhloniphi lowo mthetho asebenzisa abasebenzi njengamatoho isikhathi eside.
“INumsa ayihambisani nokuba khona kwama-labour brokers ngoba ahlukumeza abasebenzi, yingakho inyunyana yethu isenkantolo ngalolu daba,” kusho uNkk Hlubi-Majola.
Unxuse bonke abasebenzi ukuba bazibandakanye nempi yokuqeda ama-labour brokers.
Uthe uhulumeni uyena okumele angenelele ukuze kuqedwe indaba yama-labour brokers.