Iheha nabadlali abadumile le ndawo
IYADLISA indawo yobumnandi ezinze eSiphingo eyaziwa ngokuthi yiseBukhosini Astro Turf. Le ndawo iheha izinkumbi zabathandi bobumnandi uma kuyizimpelasonto.
Idle ngenyama yakhona eyehla esiphundu kanti iziphuzo ezibandayo uziphathela wena bese ukhokha u-R100 ngokungena ne-cooler box.
Ngaphandle kunendawo yokunethezeka bese kuthi ngaphesheya kube nenkundla yebhola yohlobo olwaziwa nge-indoor soccer. Le nkundla imumatha abadlali abangu-10 uma sekuhlanganiswe womabili amaqembu asuke edlala enkundleni. Amaqembu asuke ezwana amandla akhokha uR250 ngehora. Ngempelasonto edlule bekunomqhudelwano obizwa ngomkhumulajezi ohehe izinkakha zakudala zebhola ezifana noPapi Zothwane odume kuBafana Bafana, Manqoba Mkhize odume kwiKaizer Chiefs, Silver Stars nakwiLamontville Golden Arrows, Makhosonke Bhengu owayedlala kwi-Orlando Pirates, Mandla Mdunge owayegijima eSweden naseBrazil, Vusimuzi “Kanu” Vilakazi ocija ompetha beMultiChoice Diski Challenge i-Arrows.
UBheki Fakazi ongumphathi wale ndawo utshele leli phephandaba ukuthi uhlose ukuzuza izinto eziningi ngebhizinisi lakhe.
“Leli bhizinisi liqale ngoDisemba. Inhloso yami wukujabulisa abantu ngiphinde ngenze isiqiniseko sokuthi abatholwa yizifo ngokuthi bazigcine bengumqemane ngokudlala ibhola. Indawo yami ayibudayisi utshwala. Lezi eziqinile uziphathela wena bese ukhokha u-R100 nge-cooler box iyinye,” kusho uFakazi.
INanda iyona egcine inqobe umqhudelwano obuhlanganise amaqembu ayisishiyagalombili ngoLwesihlanu. Ishaye iqembu lasekhaya iDream Team kowamanqamu.
“Akulula ukuqala ibhizinisi elifana naleli. I-Sqaure metre sisodwa sibiza uR500 uma ufaka utshani okudlalelwa kubona. Inkundla iwu-25 x15m. Lapho angikayibali inkundla iyonke. Into emnandi wukuthi utshani buhlala iminyaka eyisishiyagalombili. Izinsuku esibhizi ngazo uLwesihlanu, uMgqibelo neSonto. Nezinye izinsuku siyatholakala ngazo. Kithina into emqoka wukuthi abantu bazivocavoce. Intsha sifuna ingangeni igxile ophuzweni oludakayo nasezidakamizweni.”
Indawo efana nekaFakazi ijwayeleke koMbilo, Mhlanga naseGlenwood.