Uyakhula uRasta ekuphatheni eyombhoxo
USEZOBA mningi ekuphatheni imidlalo emqoka yeVodacom Super Rugby, uRasta Rasivhenge (32) ongunondweba webala elimnyama igama lakhe elikhula ngesikhulu isivinini kwezombhoxo womhlaba.
Lokhu kufakazelwa ukunikwa kwakhe oweVodacom Bulls neHurricanes. Lo mdlalo useLoftus Versveld kusasa ngo-5.15 ntambama.
Kulo mdlalo uRasta uzobe esizwa uMarius van der Westhuizen noStephan Geldenhuys bese kuthi uMarius Jonker kube nguyena ozothatha izinqumo ezidinga ukubhekwa kwithelevishini. Lokhu kubizwa nge-TMO.
Akalona ivukana uRasta njengoba enikwa umdlalo omkhulu kangaka kodwa konke okwenzeka kulo nondweba, ongowaseGoli ngokokuzalwa, kumfanele kwazise usevuthwe ngokwanele.
URasta uqale ukusebenza kwiInternational Rugby Board (IRB) ngesizini ka-2011/2012 lapho ebephatha khona imidlalo yeCurrie Cup, Vodacom Cup neVarsity Cup. Ugqama ngale sizini nje konke kuqale ngo-2010. Ngaphandle kokuphatha imidlalo eNingizimu Afrika, uRasta ubedlalisa kumaCommonwealth Games abeseGlasgow, eScotland ngo-2014.
Uke wahlala unyaka engadlalisi uRasta ngaphansi kweSouth African Rugby Union (Saru). Ngaleso sikhathi uthathwe yi-Australian Rugby Union (Aru) ukuba azodlalisa khona ngoba bembona ukuthi unekhono. Ngaleso sikhathi umhlaba ubumazi njengonondweba wase-Australia kwazise bekubhaliswe kanjalo ngesikhathi esebenza kwi-IRB Sevens World Series.
Ubuyele ezweni lakhe iNingizimu Afrika ngo-2015 lapho esayine khona inkontileka neSaru okulandelwe wukuthi aqale abonakale esigabeni esikhulu seCurrie Cup. Ngendlela adlalise kahle ngayo kuleyo sizini yeCurrie Cup uze waklonyeliswa ngokunikwa owamanqamu. Lapho ubeziqophela irekhodi lokuba unondweba omncane kunabo bonke ukuphatha owamanqamu.
Uke wadlalisa kumaligi aseFrance kanti useke wadlalisa nakwi-Top 14 yakhona eFrance. Ufakwe ngokugcwele kwiSuper Rugby ngo-2016 njengoba sekuvela ukuthi uzoba mningi kule sizini. Okuyikona athe kukhulu okwenzeke kuyena wukunikwa umdlalo wamanqamu kuma-Olympic eBrazil ngo-2016 kubhekene i-England neFiji.
Isiyonke imidlalo yeSuper Rugby kule mpelasonto: Kusasa Highlanders v Blues (Forsyth Barr, 8.35am); Rebels v Reds (AAMI Park, 10.45am). NgoMgqibelo Sunwolves v Brumbies (Prince Chichibu Memorial Stadium, 6.15am); Crusaders v Chiefs (AMI Stadium, 8.35am); Waratahs v Stormers (Allianz Stadium, 10.45am); Lions v Jaguares (Emirates Airlines Park, 3.05pm); Bulls v Hurricanes (Loftus Versfeld, 5.15pm).