Unethemba lokudla izicoco oweChiefs
ISIBABULI seKaizer Chiefs, uJoseph Molangoane, sidalule ukuthi akukho okushintshile endleleni abenza ngayo izinto kule sizini ngaphansi komqeqeshi uSteve “Mphathi” Komphela olengelwa yizembe kuleli qembu.
IChiefs isembangweni wesicoco sePremiership ne-Orlando Pirates neMamelodi Sundowns esesicongweni. Ngaphandle kwalokho Amakhosi asenethuba lokuwina iNedbank Cup ngemuva kokudlulela kwi-Last 16 ehlula iLamontville Golden Arrows emasontweni edlule. Amakhosi azobhekana Stellenbosch edlala kwiNational First Division (NFD).
UKomphela uzoqeda isizini yesithathu kwiChiefs. Akakaze ayiwine indebe naleli qembu. Kumasizini amabili iChiefs bekushesha ukuphela ngayo ngombango wesicoco seligi. Ngesizini edlule iqede endaweni yesine, isele ngamaphuzu angu10 kwiBidvest Wits ewine isicoco ngawu-60. Ngesizini ka-2015/2016 iChiefs iqede endaweni yesihlanu, isele ngamaphuzu angu-25 kompetha iSundowns.
UMolangoane uthe bebehlala benalo ithuba lokuqoqa izindebe kodwa babulawe wukuhlulwa kweminye imidlalo kungafanele.
“Kule sizini akukho okwehlukile esikwenzile. Besihlala sinalo ithuba lokuwina. Ukuthi kulawa amanye amasizini besingabi nayo inhlanhla, sihlulwe emidlalweni engafanele. Singabadlali sinayo inkolelo kulokhu yokuthi singawina iNedbank Cup neligi. Yinto esibusayo emiqondweni yethu. Siyabakweleta abalandeli nabo bonke abantu abalesekayo iqembu. Sidinga ukuyibamba ishisa, sibheke umdlalo ngamunye ukuze sizothola imiphumela,” kusho uMolangoane. Ngaphandle kokulangazelela ukuwina indebe kubadlali beChiefs, bazimisele ukusebenzela ukuvikela uKomphela ikusasa lakhe elizulelwa ngamanqe kuleli qembu. Bayakuqonda ukuthi uma uKomphela egcina ekhonjwe indlela, umqeqeshi ozofika uzobaqalisa phansi okungaholela ekutheni kuphele amanye amasizini bengawini lutho.
UMolangoane ungomunye wabadlali abazakhele ugazi kwiChiefs ngaphansi kukaKomphela emuva kokuthi emdlalise emuva.
“Ozakwethu nethimba labaqeqeshi balokhu bengeseka sonke isikhathi. Engikudingayo manje wukuthi ngibambe indawo yami eqenjini kuze kuphele isizini,” kusho uMolangoane.
IChiefs izobhekana neBloemfontein Celtic emdlalweni wePremiership eFNB Stadium ngoMgqibelo ngo-8.15 ebusuku.
Kulo mdlalo bangase babonakale uGeorge Maluleka, Gustavo Paez no-Eric Mathoho asebeluleme ngokugcwele ngokusho kukaDave Milner ongudokotela weChiefs. Usazobhekwa kahle uTeenage Hadebe okhala ngobuhlungu eqakaleni Basazohlala bengabonakali uDumisani Zuma, Emmanuel Letsotlo bese kuthi uKabelo Mahlasela usewukhiphile ukhonkolo kodwa usazohlala engadlali.
Imidlalo ye-Absa Premiership:
Kusasa: Maritzburg United v Platinum Stars (Harry Gwala Stadium, 8pm)
NgoMgqibelo: Baroka FC v Polokwane City (Peter Mokaba Stadium, 3.30pm); Mamelodi Sundowns v SuperSport United (Lucas Moripe Stadium, 6pm); Cape Town City FC v Bidvest Wits (Athlone Stadium, 6pm); Kaizer Chiefs v Bloemfontein Celtic (FNB Stadium, 8.15pm); Free State Stars v AmaZulu FC (Goble Park, 8.15)
NgeSonto: Golden Arrows v Ajax Cape Town Princess (Magogo Stadium, 3.30); Chippa United v Orlando Pirates (Nelson Mandela Bay Stadium, 3.30pm)