UMoloi ufisa bafane neChiefs
AKAYIZWA eyokuduma ngokushaya amaqembu amakhulu nokudlala ibhola elihehayo, ekubeni imiphumela ikhomba okunye umqeqeshi weChippa United, uTebogo “Tebza” Moloi.
UMoloi uthathe izintambo zokuqeqesha kuDan “Dance” Malesela kwiChippa United eyaziwa ngokudlala ibhola elidla utshani. Selokhu efikile usezakhele igama ngokushaya amaqembu athathwa njengamakhulu.
Uqumbe phansi iKaizer Chiefs ngo 1-0 wegoli likaMark Mayambela eNelson Mandela Bay Stadium, eBhayi emdlalweni we-Absa Premiership ngoDisemba 6. UMoloi nguyena futhi okhiphe iMamelodi Sundowns kwiLast 16 yeTelkom Knockout ngegoli likaPaseka Mako.
NgoNovemba 17, uMoloi uthele othulini iBidvest Wits ngo 2-0 wamagoli kaSamuel Julies emdlalweni weligi eBidvest Stadium. Uphinde wabambana neSundowns ngo 0-0 emdlalweni weligi ekhaya ngemuva kokuyikhipha kowomkhumulajezi.
NgeSonto ngo-3.30 ntambama iChippa United izoshukana ne-Orlando Pirates eNelson Mandela Bay Stadium, eBhayi.
“Angiyithandi le nto yokuthi saziwe njengeqembu eliqumba phansi amaqembu amakhulu futhi sidlala ibhola elimnandi. Lisiza ngani ibhola elimnandi kodwa elingenayo imiphumela nezicoco?
“IChippa ijwayele ukuqeda konombolo 11 no-14 okuyinto engifuna ukuyishintsha. Awukwazi ukuhlala kule ndawo kodwa uthi udlala ibhola elihle. Abadlali bami bakhonze ukudlala uma benengcindezi. Uma izinto zike zaqala zahamba kahle bavele bathathe izinto kalula. Babonile ukuthi siqede umzuliswano wokuqala sihlezi kunombolo 5 bavele bathela imizimba phansi. Bathe uma bebona ukuthi siyaphuma kwiTop 8 bavele benyusa izinga. Badlala uma benengcindezi,” kusho uMoloi.
IChippa ihlezi endaweni yesikhombisa kwi-log.
“Njengoba sebengasekho endaweni engabahlanganisa nezembe sebezoqala bathathe izinto kalula. Usihlalo wePirates (u-Irvin Khoza) wangitshela ukuthi kunabadlali abazalelwe ukuwina, abathanda ukuwina nabakwaziyo ukuthi kuwinwa kanjani. Iqembu lethu lakhiwe yilo lonke uhlobo lwalabadlali. Ibhola elihle kumele lihambisane nemiphumela enkundleni, yindawo enhle kwilog bese iqembu lenza kahle ngokuthi okungenani lifinyelele kowodwa umdlalo wamanqamu kule miqhudelwano emithathu yemikhumulajezi. Iqembu lethu kumele lilwele ukuqeda kwiTop 4 noma kwiTop 5 hhayi ukuvika izembe,” kusho uMoloi.
IChippa ayikaze idlale emdlalweni wamanqamu kusukela yasungulwa. Ngesizini edlule ifinyelele kwi-semi final yeNedbank Cup neyeMTN 8.
“Iqembu lami ngifuna lifane neKaizer Chiefs eyayigqoka i-Admiral. Leli qembu laligijima ngoSputla Nhlapo noComputer (Vusi Lamola). Uyamazi uTeenage (Dladla) egijima ezinhlangothini? Mhlawumbe wawumncane. Ngelinye ilanga bake badlala ngokulingana ngo 5-5 neMoroka Swallows e-Orlando Stadium. Leli qembu lalidlala ibhola elimnandi, elinamagoli, imiphumela nezicoco. Nami ngifuna lokho kwiChippa,” kusho uMoloi.
UMoloi uke wasebenza nomqeqeshi weBucs uMilutin Sredojevic.
“I-Pirates ngeke siyibhayizele. Iphethe ongqondongqondo ebhentshini. Uma ungayifundi kahle izokubulala ngesibhaxu. Lapha kukhona uMicho osekhule kakhulu kunalo Micho engangisebenza naye kwiPirates. URulani Mokwena akalali, uhlaziya yonke into ngabadlali bethu. Angizazi ukuthi ngizothi ngijabule noma ngiyasaba,” kuphetha uMoloi.