Akukho soka lingenasici bakwethu
MHLELI: Nginesikhathi ngigcinile ukuloba ngiveze imizwa yami ngezinto ezishisa ibunzi.
Ngithi ake ngibuye ngiphonse esivivaneni futhi ngiqale ngibongele oqokwe ukwengamela izwe uMengameli Cyril Ramaphosa.
Sithi siyambongela mhlawumbe isikhathi sakhe bese sishayile ukuthi adle kabanzi izithelo zenkululeko. Ngiyazi iyakhalisa indlela okwenzeke ngayo kodwa ngithi ake ngehluke ebantwini abaningi ngoba sisezweni elikhululekile futhi ngeke siye nxanye singemanzi.
Empeleni obengumengameli, uMnuz Jacob Zuma (osesithombeni) ubeyindoda enomgogodla, evuthiwe kwipolitiki, ekwazi ukubekezelela noma yibuphi ubunzima futhi ubekhombisa ukuthi ulilwele naye le lizwe.
Ake nginikhumbuze ikakhulu labo asebekhohliwe. Akuyena yini uNxamalala olwele intuthuko yezindawo zasemakhaya? Akuyena yini olwele ukuthi abantu bathole imishanguzo yokuthithibalisa igciwane nengculazi uqobo na? Akuyena yini obefuna uguquko oluqala emnothweni (Radical Economic Transformation) obeluzogxila esizweni esinsundu? Akuyena yini obelwela izindaba zobunikazi bomhlaba? Uma kunguye ngivumele ngithi akukho soka lingenasici. Manje nabanye abakuhulumeni sebegiya ngethambo lakhe sengathi akukho nokukodwa okuhle akwenzile. Eqinisweni bambalwa abaholi abayofana naye ngokwenza .
Ubedinwa kodwa ekwazi ukuziqoqa, ahlaziye kahle uma sekuyisikhathi sokuba aphendule angaxhomondeli. Noma sekunje kodwa sikhulekela iNingizimu Afrika enokuthula nenqubekela phambili kuzo zonke izakhamuzi zakule lizwe. Bonginkosi Ndlovu ZENZELENI COMMUNITY CENTRE EMPOPHOMENI