IChiefs izovuselela inkontileka yensika yayo
I-KAIZER Chiefs izovuselela inkontileka yensika yomdlali uSiphiwe “Shabba” Tshabalala oyisithandwa sabalandeli baMakhosi. Inkontileka kaShabba neChiefs iyaphela ngoJuni.
Lezi zindaba zitshelwe Isolezwe nguJazzman Mahlakgane ophethe izindaba zaleli nxele eseliphenduke ingwazi yeChiefs.
“Siyakhuluma neChiefs ngenkontileka entsha kaShabba. Weneme kwiChiefs futhi neqembu leneme ngomsebenzi wakhe. Njengamanje sesikhuluma indaba yezinombolo ngemuva kwalokho bese siyaqeda,” kusho uMahlakgane.
UTshabalala ufike kuMakhosi ngo-2007 esuka kwiFree State Stars. Kuleli qembu usezinqobe zonke izicoco eNingizimu Afrika. Usenqobe izicoco ezimbili ze-Absa Premiership, ezintathu zeTelkom Knockout neseNedbank Cup.
Kwelesizwe usedlale imidlalo engu-91 washaya amagoli angu-12.
“Noma kanjani uShabba uzohlala kwiChiefs. Kungenzeka ivuselelwe ngonyaka inkontileka nombandela wokuthi yelulwe uma isiphela. Njengamanje yinto esiyixoxayo neChiefs,” kusho uMahlakgane.
UTshabalala (33) usedlale kuMakhosi imidlalo engaphezu kuka-300 washaya amagoli angaphezu kuka-50. Usedlale esigabeni esikhokhelayo iminyaka angu-14. Wazakhela igama ngeNdebe yoMhlaba yokuqala esike yadlalelwa e-Afrika ngesikhathi eshayela iBafana Bafana igoli idlala ngokulingana neMexico eFNB Stadium, eSoweto, eGoli ngo-2010 eNingizimu Afrika.
Leli goli lagcina lifakwe ohlwini lwamagoli avelele. Enye insika ephelelwa yinkontileka ngoJuni nguHappy Jele we-Orlando Pirates.
“Ukaputeni (uJele) ngeke aze abe nenkinga. Asikho isidingo sokutatazela. Yinto sizoyilungisa emasontweni azayo. Nokho asijahile,” kusho uMahlakgane.
UJele uqale ukudlala esigabeni esikhokhelayo kuyona iPirates ngo-2006. Akakaze aphinde adlalele elinye iqembu ngaphandle kwePirates. Kuleli qembu usedlale imidlalo engaphezu kuka-200.