Kuthungathwa ababulale iphoyisa kuphangwa isitolo
KUFUNWA abasolwa abadubule babulala iphoyisa (54) lakwaMaphumulo kuphangwa isitolo.
Kuthiwa badubule babulala uCaptain Leonard Mhlanzi kuphangwa esinye sezitolo ezinkulu KwaMaphumulo ngoLwesihlanu ntambama emuva kwehora lesine. Kuthiwa ubengekho emsebenzini ngesikhathi ebulawa. Uchazwe njengephoyisa ebelizinikele futhi lizibophezele emsebenzini walo.
Laba balisa esingaqinisekisiwe isibalo sabo bangene esitolo esidayiza izimpahla zokwakha baphanga abasebenzi bashaqa nesamba semali esingadaluliwe. Kuthiwa badlulele esitolo okubulawe kuso uMhlanzi.
Okhulumela amaphoyisa Kwazulu-Natal, uCol Thembeka Mbele uthe ngesikhathi abasolwa bengena esitolo bazithele phezu kukaMhlanzi obengasebenzi ngesikhathi kwenzeka lesi sigameko.
“Abasolwa bamdubule, bamlimaza base bebaleka ngemoto. Iphoyisa liphuthunyiswe esibhedlela, lashonela khona. Kuvulwe icala lokubulala nelokuphanga,” kusho uCol Mbele.
Unxuse amalungu omphakathi angaba nolwazi ngabasolwa ukuthi athinte amaphoyisa akwaMaphumulo ku-032 481 4400 noma athinte noma yisiphi isiteshi esiseduzane. Bangashayela nenombolo yocingo yokubika ubugebengu ku-08600 10111.
Obambe kwesokuba ngukhomishana wamaphoyisa uMajor General Bheki Langa usigxekile lesi sigameko. Uthe ngeke baphumule bengakabatholi laba abathinteka ekubulaweni kwaleli phoyisa. Udlulise amazwi enduduzo emndenini walo nabangani wathi sekusungulwe ithimba elizoqinisekisa ukuthi bayabanjwa abathintekayo bese beshushiswa.
Kwenzeka lesi sigameko nje kusanda kubulawa iphoyisa likamasipala, uConstable Sipho Khanyile (50) waKwaMashu. UKhanyile kuthiwa ubulawe ngoLwesibili oludlule esemsebenzini. Ubulawe emgwaqweni, u-R102 ngaseMount Moriah, ePhoenix.